Кыргызстанда жашоо барган сайын кымбаттап жатат: баалардын өсүшү боюнча статистика

Мындай маалыматты Улуттук статистика комитети жарыялады.

Эң көп кызмат көрсөтүүлөр кымбаттап, алардын баасы 11,4%га өскөн. Азык-түлүк эмес товарлар 6,1%га, ал эми азык-түлүк жана алкоголсуз суусундуктар 6,4%га кымбаттаган.

Айрыкча эттин баасы кыйла өскөн. Жыл башынан бери кой эти 25,1%га, уй эти 17,2%га кымбаттаган. Тоок жумурткасы 12,7%га, балык 7,2%га, сүт азыктары 7,1%га, ал эми колбаса жана башка эт азыктары 7,4%га өскөн.

Ошол эле учурда айрым азык-түлүктөр арзандаган. Жаңы жашылчалардын баасы 24,2%га, картошка 17%га, күрүч 1,3%га, ал эми нан 0,4%га төмөндөгөн.

Азык-түлүк эмес товарлардын ичинен жаңы жеңил автоунаалардын баасы эң көп өсүп, 17%ды түзгөн. Күйүүчү-майлоочу материалдар 15%га, газ 14,9%га, эмерек жабуулары 11,8%га кымбаттаган.

Күйүүчү майдын баасы да өзүнчө өскөн. Август айында АИ-92 үлгүсүндөгү бензиндин орточо баасы литрине 88,64 сомго, ал эми дизель майы 101,74 сомго жеткен. Жыл башынан бери бензин 16,8%га, дизель майы 25,1%га кымбаттаган.

Кызмат көрсөтүүлөрдүн тарифтери да кыйла жогорулаган. Жыл башынан бери турак жайды оңдоо кызматтары 30,1%га, мейманканалар менен ресторандардын кызматтары 22,8%га, чач тарач кызматтары 20,2%га, транспорттук кызматтар 12,6%га кымбаттаган.

Август айында баалар жана тарифтер июль айына салыштырмалуу дагы 0,8%га өскөн. Мында өлкөнүн бардык аймактарында кымбаттоо катталган.

Жыл башынан бери баалар эң көп Ош облусунда өсүп, 17,3%ды түзгөн. Бишкек шаарында өсүш 7,8%ды, Жалал-Абад облусунда 7,8%ды, Ысык-Көл облусунда 9,5%ды түзгөн.