Кыргызстандын банктарына сакталган аманаттар беш жылда 3,5 эсеге көбөйдү

Бул тууралуу Улуттук статистикалык комитет тарабынан даярдалган статистикалык басылмада айтылат.

Беш жылдын ичинде аманаттардын саны 3,5 эсеге көбөйдү

Улуттук статистикалык комитеттин маалыматы боюнча, 2024-жылдын аягына карата калктын банктык депозиттеринин саны 14,5 миллион эсепти түзүп, 2020-жылга салыштырмалуу 3,5 эсеге көп. 2023-жылга салыштырмалуу өсүү 32,4%ды түздү.

Депозиттердин санынын көбөйүшүнүн негизги фактору болуп мобилдик банкинг системаларынын жигердүү өнүгүшү жана аларды колдонгон жарандардын санынын өсүшү эсептелет.

Депозиттердин өсүшү жана банк тутумуна болгон ишеним

2024-жылы калктан тартылган каражаттардын көлөмү (чыгууну эске алуу менен) 55,6 млрд сомду түзүп, өткөн жылга салыштырмалуу 21,7%га көп болгон.

2025-жылдын 1-январына карата калктын банктардагы депозиттеринин калдыгы бир жыл ичинде дээрлик 26%га өсүү менен 270 млрд сомго жетти.

Депозиттердин валюталык структурасы

Депозиттердин жалпы түзүмүндө чет өлкө валютасындагы депозиттер 43%ды, улуттук валютадагы (сомдогу) депозиттер 56,8%ды түзгөн.

Статистикалык комитет бул динамика калктын банк тутумуна болгон ишениминин өсүп жатканын белгилейт.