FIFA World Cup 2026 коллекциялык монетасы «Айдын монетасы» номинациясын жеңип алды

FIFA WORLD CUP 2026 коллекциялык монетасы Казакстандын Улуттук банкы менен 2026-жылдагы футбол боюнча дүйнө чемпионатына арналган коллекциялык монеталарды чыгарууга FIFAнын расмий лицензиясына ээ болгон Германиянын MDM Münzhandelsgesellschaft mbH & Co. KG Deutsche Münze (MDM) нумизматикалык компаниясынын өнөктөштүгүндө даярдалган. 

Монета 925-үлгүдөгү  күмүштөн жасалып, айрым бөлүктөрү алтын жалатуу жана түстүү басма технологиясы колдонулган. Номиналдык баасы 1000 теңге, салмагы - 20 грамм, диаметри - 37 мм, сапаты - proof. Жалпы тиражы 2 000 даана. Анын ичинен 1 500 монета Казакстандын ички рыногу үчүн, дагы 500 монета MDM компаниясы аркылуу эл аралык рынокко чыгарылган. 

2026-жылдагы дүйнө чемпионаты тарыхый турнир болду. Ал FIFA”нын 23-дүйнө чемпионаты катары тарыхка кирип, биринчи жолу үч өлкөдө (Канада, АКШ жана Мексикада) өткөрүлдү. Ошондой эле финалдык баскычка катышкан улуттук курамалардын саны 48ге чейин көбөйүп, турнир дүйнө чемпионаттарынын тарыхындагы эң масштабдуусу болуп калды. 

Коллекциялык монетанын дизайны мундиалдын башкы символдорун чагылдырат. Реверстин жогорку бөлүгүндө чемпионаттын оюндарын кабыл алган өлкөлөрдүн – Канада, АКШ жана Мексиканын мамлекеттик туулары чагылдырылган. Борбордук бөлүгүндө континенттердин элестери түшүрүлгөн жер шары жана «FIFA WORLD CUP 26™» жазуусу жайгашкан. 

Композициянын төмөнкү бөлүгүн FIFA”нын Дүйнө кубогу көрккө чыгарат. Анын эки тарабында стилдештирилген футбол тобунун фонунда футболчулардын силуэттери жайгашып, мелдештин духун жана планетанын башкы футбол турнири салттуу түрдө бириктирип келген дүйнөлүк ынтымакты символдоштурат. 

Коллекциялык монета 2026-жылдагы дүйнө чемпионатынын эстелик символуна айланып, футбол күйөрмандары үчүн да, коллекционерлер үчүн да кызыгуу жаратат. Ал дүйнөлүк футболдун тарыхында жаңы баракты ачкан турнир тууралуу эстеликти сактап калат. 

FIFA WORLD CUP 2026 коллекциялык монетасы үчүн кошумча сыймык катары анын дүйнөдөгү эң ири эл аралык нумизматикалык World Money Fair көргөзмөсүнүн «Айдын монетасы» (Coin of the Month) номинациясында жеңүүчү болушу эсептелет. Бул сыйлык көркөмү, дизайнынын өзгөчөлүгү жана жогорку сапаты менен айырмаланган монеталарга ыйгарылат. Ошондуктан 2026-жылдагы футбол боюнча дүйнө чемпионатына арналган бул чыгарылыш коллекционерлер жана футбол күйөрмандары үчүн өзгөчө баалуу болуп саналат.