Кыргызстанда январь-октябрда өлкөнүн ИДПсы 1,4 трлн сомдон ашты

Бул тууралуу бүгүн, брифингде Улуттук статистикалык комитеттен билдиришти.

Өсүүнүн негизги кыймылдаткычы

ИДПнын өсүшү товар өндүрүү, кызмат көрсөтүү тармактары жана продукттарга болгон таза салыктардын эсебинен камсыз болду. 

• товар өндүрүү тармактарынын өсүү темпи - 11,3 %га; 
• кызмат көрсөтүү - + 8,8 %га;
• продукттарга болгон таза салыктар - +10,8 %га.  

Эске салсак, мындан бир ай мурун Кыргызстанда ИДПнын өсүшүнүн кыймылдаткычтары фармацевтика жана курулуш болгон. Алдын ала эсептөөлөр боюнча, 2025-жылдын январь-сентябрь айларында Кыргызстандын ИДПсы 1 триллион 240,5 миллиард сомду түзүп, 2024-жылдын ушул мезгилине салыштырмалуу 10%га көп болду.

ИДПнын структурасы

ИДПнын түзүмүндөгү эң чоң үлүш -49,6 пайыз кызмат көрсөтүү тармактарына туура келди, бул өткөн жылдын январь-октябрь айларына салыштырмалуу 1,3 пайыздык пунктка тѳмѳндѳгѳн.  

Ошол эле учурда товар өндүрүү тармактарынын үлүшү, тескерисинче, 1,8 пайыздык пунктка жогорулап, 35,4 пайызды түздү. 

Тармактар боюнча: 

• курулуштун үлүшүнүн өсүшү - 1,2 %; 
• өнөр жайдын үлүшү – 1,0 %; 
• айыл чарбасынын үлүшү, 0,4 %га төмөндөгѳн.

Улуттук статистикалык комитеттин эскертүүсү

Улуттук статистикалык комитет ИДПны эсептөө экономиканын өнүгүү тенденцияларын чагылдырып, анализдин натыйжалуулугун камсыз кылуу максатында жүргүзүлөрүн түшүндүрдү.

Методология ИДПнын түзүмүндөгү жалпы үлүшү болжол менен 55%ды түзгөн айыл чарбасы, өнөр жай, курулуш, соода, мейманканалар жана ресторандар, транспорт жана байланыш тармактары боюнча өндүрүштүн индекстеринин өзгөрүшүнө негизделген.