Инфляция күч алууда: кыргызстандыктар кайсыга көп төлөп жатышат

Кыргызстанда 2026-жылдын башынан бери керектөө баалары жана тарифтер 5,5%га жогорулады. Бул тууралуу Улуттук статистика комитетинин төрагасы Бактыбек Кудайбергенов брифинг учурунда билдирди.

Январь-июнь айлары аралыгында баалардын эң чоң өсүшү төмөнкүлөр боюнча катталган:

• кызмат көрсөтүүлөр 8,3%;
• алкоголдук ичимдиктер жана тамеки буюмдары 7,2%;
• тамак-аш жана алкоголсуз суусундуктар 5,4%;
• азык-түлүк эмес товарлар 3,3%.

Баалар кескин түрдө жаңы мөмө-жемиш, кой эти, уй эти, картошка, сүт азыктары, макарон, балык, кумшекер жана өсүмдүк майына жогорулады.

Ошол эле учурда жашылчалар, куюлган сүт жана күрүч төмөндөдү.

Өлкөнүн бардык аймактарында баалардын жогорулашы катталды. Эң жогорку инфляция Ош облусунда - 12,5% байкалса, азык-түлүк бааларынын эң олуттуу өсүшү Ысык-Көл облусунда болду.