Камсыздандыруу компаниялары кирешелерин жоготуудабы – статистика

Мындай маалымат Статкомдун отчетунда айтылат. 

Январь-март айларында камсыздандыруучулардын кирешелери өткөн жылга салыштырмалуу 38,3%га өсүү менен 2,9 млрд сомду түздү. Бирок чыгашалар андан да тез - 1,4 эсеге өсүп, 2,8 миллиард сомго жетти.

Кварталдын жыйынтыгы боюнча 11 камсыздандыруу компаниясы 323,5 миллион сом суммасында киреше алышса, 6 компания жоготуу менен аяктаган. Натыйжада, камсыздандыруу секторунун чогуу алгандагы кирешеси 2025-жылдын биринчи кварталына салыштырмалуу 26,3%га төмөндөп, 80,5 млн сомду түздү.

Ошол эле учурда камсыздандыруу кызматтарына суроо-талаптын өсүшү уланган. 1-апрелге карата 735,3 миң камсыздандыруу келишими түзүлгөн, бул өткөн жылга салыштырмалуу 17,8%га көп. Келишимдердин басымдуу бөлүгү, тагыраагы 92% жеке жактар менен түзүлгөн. Ыктыярдуу камсыздандыруу бардык келишимдердин 72%дан ашыгын түздү, калганы милдеттүү камсыздандыруудан турат.

Түзүлгөн келишимдер боюнча жалпы камсыздандыруу суммасы эки эсеге көбөйүп, 852,2 миллиард сомго жетти. Ыктыярдуу камсыздандыруу эң чоң үлүштү - 330,9 миллиард сомду түздү, андан кийин милдеттүү камсыздандыруу (223,9 миллиард сом) жана мүлктү камсыздандыруу (212,1 миллиард сом) болду. 

Камсыздандыруу төгүмдөрү дагы олуттуу 1,7 эсеге өсүп, 2,53 миллиард сомго жетти. Каражаттын эң көп түшүүсүн төмөнкүлөр камсыздаган:

• ишканалардын мүлкүн ыктыярдуу камсыздандыруу — 796 миллион сом;
• кырсыктардан жана оорудан ыктыярдуу жеке камсыздандыруу — 696,9 миллион сом.

Камсыздандыруу төлөмдөрүнүн көлөмү 1,8 эсеге көбөйүп, 480,7 млн сомго жеткен. Эң көп төлөмдөр ыктыярдуу мүлктүк камсыздандыруу (198,1 млн. сом) жана ОСАГО боюнча (177,7 млн. сом) төлөндү.