Кыргызстанда санкциялык тобокелдиктерден улам 52 компания ишмердүүлүгүн токтотту

Жолугушууда Кыргызстандын санкциялык тобокелдиктерди азайтуу жана финансылык көзөмөлдү күчөтүү боюнча аткарган иштер тууралуу маалымат берилди.

Бакыт Сыдыков эл аралык санкцияларды айланып өтүү үчүн өлкөнүн финансылык системасын пайдаланууга жол берилбей турганын жана бул маселе өлкө жетекчилигинин жеке көзөмөлүндө экенин баса белгиледи.

Жүргүзүлгөн иштердин алкагында 52 юридикалык жак ишин токтотту, ал эми 57 юридикалык жакка карата мажбурлап жоюу жол-жоболору башталды жана 25 юридикалык жак текшерилүүдө. 

Мындан тышкары, мамлекеттик банктар 240тан ашык эсепти тейлөөнү токтотту. Ошондой эле санкциялык системага баа берүү үчүн эл аралык Kroll консалтингдик компаниясы тартылууда.

Дипломаттарга экспорттук көзөмөлдү өркүндөтүү, виртуалдык активдер чөйрөсүн жөнгө салууну күчөтүү жана мүмкүн болуучу санкциялык тобокелдиктердин алдын алуу боюнча чаралар өзүнчө тааныштырылды.

Брифингдин жүрүшүндө тараптар эл аралык өнөктөштөр менен мындан аркы кызматташтыкты да талкуулашты. Маалымат алмашуу, эксперттик консультацияларды өткөрүү жана санкциялык тобокелдиктердин алдын алуу боюнча биргелешкен ыкмаларды иштеп чыгуу маселелери каралды.

«Биз сиздер менен үзгүлтүксүз жолугушуп турууну пландап жатабыз. Жүргүзүлүп жаткан иштер тууралуу сиздерге маалымат берип турабыз», - деди Бакыт Сыдыков.

Эске салсак, 2025-жылдын 24-февралында Кыргызстандын «Керемет Банкына» Улуу Британия санкция киргизген. Санкциялар Орусиянын 67 жеке адамына жана компаниясына, ошондой эле «көмүскө флоттун» 40 кемесине карата киргизилген.

Ал эми 2025-жылдын 20-августунда Улуу Британиянын Финансылык санкцияларды көзөмөлдөө башкармалыгы (OFSI «Борбордук Азиянын Капитал Банкы» ААКсын жаңыланган санкциялык тизмеге киргизген.

Буга чейин Кыргызстандын коммерциялык банктарынын бирине санкция киргизилишине байланыштуу Улуттук банк билдирүү жасап, банк сектору туруктуу экенин билдирген болчу.