Кыргызстанда бизнес үчүн салыкты кайра карап чыгышты: негизги өзгөртүүлөр

Президент Садыр Жапаров салык мыйзамдарына өзгөртүүлөрдү киргизген мыйзамга кол койду.

Мамлекеттик салык кызматы билдиргендей, документ Салык кодексиндеги боштуктарды жана карама-каршылыктарды четтетүүгө, ошондой эле ишкердик иш жүргүзүү үчүн кыйла жагымдуу шарттарды түзүүгө багытталган.

Негизги өзгөртүүлөрдүн катарында: 

• креативдүү индустриялар паркынын резиденттери үчүн 5 жылдык мөөнөткө бирдиктүү салыктын ставкасы нөл пайыз өлчөмүндө белгиленди.
• 2027-жылдын 1-январынан тартып кызмат көрсөтүүчү субъекттер үчүн төлөө формасына карабастан бирдиктүү салыктын төмөнкүдөй ставкалары белгиленди: сауна жана мончолор үчүн - 5%, коомдук тамактануу кызматтарын көрсөтүүчү субъекттер үчүн Бишкек жана Ош шаарларында - 5%, башка аймактарда – 3%.
• жаңы курулган турак жана турак эмес жайларды сатуу боюнча иш үчүн бирдиктүү салыктын ставкасы төлөө формасына карабастан 4% өлчөмүндө белгиленди.
• 2026-жыл үчүн салыктык милдеттенмелерди автоматтык түрдө түзүүнүн натыйжасында эсептелген кыймылсыз мүлк салыгы боюнча туумдар эсептелбейт.
• бирдиктүү салыктын негизиндеги салык салуунун жөнөкөйлөтүлгөн системасын колдонгон салык төлөөчүгө 2026-жылдын 1-октябрына чейин салык салуунун жөнөкөйлөтүлгөн системасынан өз ыктыяры менен чыгып, жалпы салык режимине өтүү укугу берилди.
• алтын жана күмүш боюнча тоо кендерин казып алуучу жана тоо кендерин кайра иштетүүчү ишканалардын кирешелерине салыктын ставкасы эл аралык товардык биржалардагы бааларды эске алуу менен жогорулатылды.
• транзакцияга салык режиминин аныктамасы такталды жана аны колдонуу чөйрөсү кеңейтилди.
• үчүнчү өлкөлөрдөн жеке жактар сатып алган товарлар менен электрондук соода жүргүзүүдө уюмдарды башкаруу боюнча функциялар Салык кызматынын органдарына өткөрүлүп берилет.

Мындан тышкары, мыйзам менен бизнестин айрым категорияларына эсептен чыгаруу боюнча ченемдер каралган. 

Анда, айыл чарба жаныбарларын сатууда салык калдыгынын суммасынын 97 пайызы, салык төлөөчү салык калдыгынын 3 пайызын төлөнгөн шартта эсептен чыгарылууга тийиш. Көмүр казып алуу ишин жүзөгө ашыруучу ишкердик субъекттерине 2026-жылдын 31-декабрына чейин салык калдыгынын суммасын толук төлөгөн шартта эсептен чыгарылууга тийиш.

Ошондой эле, доонун эскирүү мөөнөтү аяктагандан кийин ашыкча төлөнгөн салыктык эмес кирешелердин суммасын, ошондой эле туумдарды салык төлөөчүнүн өздүк эсебинен бюджеттин пайдасына эсептен чыгаруу жөнүндө ченем киргизилүүдө.