Кыргызстандын экономикасы өстү: жети айдын негизги көрсөткүчтөрү

Бул тууралуу Улуттук статистика комитети өлкөнүн социалдык-экономикалык абалы боюнча өткөн брифингде билдирди.

2025-жылдын ушул эле мезгилине салыштырмалуу ИДП 11,1%га өскөн.

Экономиканын өсүшүн бир нече негизги тармак камсыздады. Алар - өнөр жай, курулуш, айыл чарба жана кызмат көрсөтүү тармактары, ошондой эле продукцияларга салынган салыктардын көбөйүшү.

Өнөр жайда абал кандай болууда

2026-жылдын жети айында өнөр жай өндүрүшүнүн көлөмү 525,3 млрд сомду түздү. Бул өткөн жылдын ушул эле мезгилине салыштырмалуу 11,2%га көп.

Өсүүгө тамак-аш азыктары жана тамеки, негизги металлдар, фармацевтикалык продукция, курулуш материалдары, жыгач жана кагаз буюмдары, полиграфиялык продукция, транспорт каражаттары, тазаланган мунай заттары жана химиялык продукцияны өндүрүүнүн көбөйүшү таасир тийгизди.

Мындан тышкары, пайдалуу кендерди казып алуунун көлөмү да өстү.

Айыл чарба 6%га өстү

Айыл, токой чарбасы жана балык уулоочулук тармактарындагы дүң продукциянын көлөмү 215,4 млрд сомго жетти.

2025-жылдын январь-июль айларына салыштырмалуу бул көрсөткүч 6%га өскөн. Негизги себеп өсүмдүк өстүрүүчүлүктө өндүрүлгөн продукциянын көлөмүнүн көбөйүшү.

Курулушта өсүштүн эң жогорку көрсөткүчтөрүнүн бири катталды

2026-жылдын жети айында курулуш тармагындагы дүң продукциянын көлөмү 245,1 млрд сомду түздү. Бир жыл ичинде бул көрсөткүч 1,6 эсеге өскөн.

Улуттук статистика комитети мындай өсүштү биринчи кезекте негизги капиталга салынган инвестициялардын көбөйүшү менен байланыштырууда.

Январь-июль айларында инвестициялардын жалпы көлөмү 238,3 млрд сомго жетти. Бул да өткөн жылга салыштырмалуу 1,6 эсеге көп.

Мында ички каржылоо булактары 1,4 эсеге, ал эми тышкы каржылоо булактары 3,1 эсеге көбөйгөн.

Инвестициялардын дээрлик 90%ы транспорт жана жүктөрдү сактоо объектилерин курууга, пайдалуу кендерди казып алууга, билим берүүгө, энергетикага, кайра иштетүү өнөр жайына жана турак жай курулушуна багытталган.

Соода 4%га өстү

Январь-июль айларында дүң жана чекене сооданын жүгүртүүсү 1 трлн 149,6 млрд сомду түздү.

Өткөн жылдын ушул эле мезгилине салыштырмалуу көрсөткүч 4%га өскөн. Өсүшкө негизинен чекене соода, ошондой эле автоунааларды жана мотоциклдерди оңдоо кызматтары салым кошкон.

Экономика эмнелердин жыйындысынан турат 

Учурда Кыргызстандын ИДПсынын дээрлик жарымын кызмат көрсөтүү тармагы түзөт.

2026-жылдын январь-июль айларындагы ИДПнын түзүмүндө:

• кызмат көрсөтүү тармагы — дээрлик 50%;
• өнөр жай — 19,6%;
• айыл чарбасы — 6,4%;
• курулуш — 8,2%;
• азык-түлүккө салынган салыктар — 16%.

Демек, Кыргызстандын экономикасынын өсүшүнүн негизги кыймылдаткычтары болуп кызмат көрсөтүү тармагы, өнөр жай, курулуш жана инвестициялар эсептелүүдө.

Белгилей кетсек, буга чейин 2026-жылдын январь-июнь айларында ИДПнын көлөмү 960 млрд сомду түзүп, өткөн жылдын ушул эле мезгилине салыштырмалуу 11,9%га өскөн.