Кыргызстанда тамеки жана стиктердин минималдуу баасы жогорулайт

Документке ылайык, 2027-жылдын 1-январынан тарта 20 даана тамекинин бир кутусу 135 сомдон арзан сатылбайт. Ал эми 20 стиктин да минималдуу баасы ушундай эле белгиленди.

Андан ары баалар этап-этабы менен жогорулатылат:

• 2027-жыл — 20 даанасы 135 сом;
• 2028-жыл — 150 сом;
• 2029-жылдан тарта — 165 сом.

Жаңы минималдуу баалар фильтрлүү жана фильтрсиз тамекилерге, сигарилла, ошондой эле күйгүзүүчү система камтылган цилиндр формасындагы буюмдарга - стиктерге жана капсула кошулган тамекилерге  карата колдонулат.

Минкабдан түшүндүрүшкөндөй, мындай чечим тамеки буюмдарын керектөөнү азайтуу жана калктын ден соолугун чыңдоо максатында кабыл алынган.

Белгиленген баалардын сакталышын Мамлекеттик салык кызматы көзөмөлдөйт.

Жаңы токтом 2027-жылдын 1-январынан тарта күчүнө кирет.

Эске салсак, Экономика министрлиги минкабдын 2026–2027-жылдарга товар жана кызмат көрсөтүүлөрдүн бааларын турукташтыруу боюнча план долбоорун иштеп чыккан.