Кыргызстанда пенсиялык чегерүүлөр 2%дан 10%га чейин көбөйүшү мүмкүн

Бул тууралуу Социалдык фонддун төрагасы Бактияр Алиев брифингде билдирди.

Анын айтымында, бул пенсиялык реформанын экинчи этаптагы  варианттарынын бири. Келечекте өлкө 10 жылдын ичинде тилектештик-топтомо пенсиялык системага өтүшү мүмкүн.

Учурда пенсиялык чегерүүлөрдүн жалпы 27%ынан жарандардын топтомо эсептерине 2%ы гана багытталат. Социалдык фонд каражаттарды бөлүштүрүү тартибин өзгөртүүнү сунуштап жатат: пенсиянын тилектештик жана топтомо бөлүктөрүнө 10%дан бөлүү каралууда.

Бирок мындай системага өтүү үчүн республикалык бюджеттен кошумча каражат талап кылынат. Себеби чегерүүлөрдүн бир бөлүгү азыркы пенсионерлерге төлөнүүчү пенсияга жумшалбастан, жарандардын жеке топтомо эсептерине түшөт. Ошондуктан өтүү мезгилинде Пенсиялык фонддо каражат тартыштыгы жаралышы мүмкүн.

Учурда Социалдык фонд Финансы министрлиги менен биргеликте эсептөөлөрдү жүргүзүп, реформаны ишке ашыруунун каржылык мүмкүнчүлүктөрүн баалап жатат.

«Эгерде Финансы министрлиги бул демилгени колдосо, 10 жылдын ичинде тилектештик-топтомо системасына толук өтө алабыз», - деп белгиледи Алиев.

Жаңы системага өткөндөн кийин жарандар пенсияга чыкканда аларга базалык пенсия дайындалат. Мындан тышкары, аларда тандоо мүмкүнчүлүгү пайда болот: топтолгон каражаттарын системада калтырып, камсыздандыруу пенсиясын алуу же бардык топтомдорун бир жолку төлөм менен алуу. Экинчи учурда адам базалык пенсияны гана алат.

Ошол эле учурда Алиев азырынча бул маселе каралып жатканын баса белгиледи. Пенсиялык реформанын акыркы параметрлери азырынча бекитиле элек.