Кыргызстанда бааларды турукташтыруу: Экономика министрлиги эмнелерди сунуштады

Министрликтин маалыматына ылайык, негизги максат - 2027-жылы инфляциянын деңгээлин 7,7–8,5% диапазонунда кармап туруу болуп саналат. Кошумча чараларсыз инфляциянын 8,7–9,5%га чейин тездөө тобокелдиги жаралат.

Бийлик төмөнкүлөрдү сунуштайт: 

• кеминде 20 миң баш ири мүйүздүү малды импорттоо, бул эт сунушун кеминде 2,7 миң тоннага көбөйтүүгө мүмкүндүк берет;
• жалпы сактоо көлөмү 18 миң тоннаны түзгөн 11 заманбап транспорттук-логистикалык борбор куруу; 
• ортомчуларсыз эт жана азык-түлүк сатылуучу 100 түз сатуу түйүнүн ачуу;  
• жүгөрү айдоо аянтын 10 миң гектарга кеңейтүү;
• 10 000 баш малга эсептелген 200 короо-сарай аянтчасын куруу; 
• Орусия жана Казакстандан 700 миң тонна буудай жеткирүү жана аны импорттоодо КНСтен бошотуу мөөнөтүн 2027-жылдын аягына чейин узартуу.
• жалпы көлөмү 100 миң тонналык 10 жаңы дан сактоочу жай куруу;
• 4 жаңы комплекстүү канаттуулар фабрикасын куруу;
• май өсүмдүктөрүнүн айдоо аянтын 10 миң гектарга кеңейтүү;
• 50 сүт кабыл алуу пунктун уюштуруу.

Белгиленгендей, калк үчүн тарифтерди, жыйымдарды, кызмат көрсөтүүлөрдүн наркын жана башка төлөмдөрдү жогорулатууга бир жылдык мөөнөткө мораторий киргизилген.

Мындан тышкары, турак жайды ижарага берүүнүн баасы негизинен рыноктук механизмдердин негизинде түзүлөт жана суроо-талап менен сунуштун катышына жана башка экономикалык факторлорго көз каранды. Мамлекеттик жөнгө салуу турак жайды ижарага берүү рыногунда туруктуу бааларды белгилөөнү карабайт. Ошол эле учурда мамлекет турак жайдын жеткиликтүүлүгүн жогорулатууга багытталган чараларды көрө алат. Бул багытта ипотекалык компания тарабынан тиешелүү иштер жүргүзүлүүдө.

Ал эми күйүүчү майга болгон баачы? Мамлекет импорттолгон күйүүчү майдын иш жүзүндөгү наркы менен белгиленген чекене баанын ортосундагы айырманы компенсациялоону улантууда. 24–25-августка карата мунай трейдерлерине 956, 1 млн сом жөнөтүлгөн. Субсидиялоо механизминин мөөнөтү 2026-жылдын аягына чейин узартылган.

Учурда максималдуу чекене баалар төмөнкүдөй:

• АИ-92 бензини — литрине 87,90 сом;
• дизель майы — 99,90 сом;
• автоунаа газы — 48,80 сом.

«Айыл чарбасын каржылоо - 14» долбоорунун алкагында жалпы суммасы 5 млрд 448 млн сомду түзгөн жылдык 6% менен 8256 жеңилдетилген кредит берилген. 

2024–2026-жылдары «100 өнөр жай ишканасы» долбоорун ишке ашыруунун алкагында 281 ишкана пайдаланууга берилди, 2 млрд АКШ долларынан ашык инвестиция тартылып, 20 миң 800гө жакын жумуш орду түзүлдү. Жыл аягына чейин дагы 47 жаңы өнөр жай ишканасын пайдаланууга берүү пландалууда