Мамлекеттик банктар эсептерди жабууда: дагы 19 компания жабылуу алдында турат

Экономика министрлигинен билдиришкендей, Кыргыз Республикасынын президентинин атайын тапшырмалар боюнча атайын өкүлү Бакыт Сыдыковдун төрагалыгы астында эл аралык санкциялык режимдерди сактоо чөйрөсүндө мамлекеттик саясатты ишке ашыруу маселелери боюнча кеңешме болуп өттү. Ага Улуттук банктын жана коммерциялык банктардын өкүлдөрү катышты.

Буга чейин мамлекеттик органдар тарабынан санкциялык тобокелдиктердин жогорулашы менен байланышы мүмкүн болгон компаниялардын болжол менен 40 тизмеси түзүлгөн. Ведомстволор аралык топтун текшерүүлөрүнөн соң, дагы 19 компаниянын ишин токтотуу зарылчылыгы жөнүндө чечим кабыл алынды.

Аны ишке ашыруу үчүн Кыргыз Республикасынын мыйзамдарында белгиленген тартипте аталган юридикалык жактарды мажбурлап жоюу процессин демилгелөө жөнүндө адилет органдарына кайрылуу жөнөтүлдү. Калган компаниялар боюнча алардын ишмердүүлүгүнө кененирээк текшерүү уланууда.

Мындан тышкары, Улуттук банк төлөм кызматтары жана төлөм сервистери чөйрөсүндө көзөмөлдү жана жөнгө салууну өркүндөтүү боюнча чаралары тууралуу маалымат берилди. Ишке ашырылып жаткан чаралар санкциялык тобокелчиликтерди азайтууга, каржылык операциялардын ачык-айкындуулугун жогорулатууга, ошондой эле Кыргызстандын улуттук мыйзамдарынын жана эл аралык милдеттенмелеринин талаптарын сактоону камсыздоого багытталган.

Мамлекеттик банктар эмне кылышты:

2026-жылдын июль айынан 14-августуна чейин:

«Элдик Банк» ААКсы болжол менен 109 компания менен ишкер мамилелерин токтотту, дагы 20га жакын компаниянын эсептерин жабуу процесси жүрүп жатат. Банк санкциялык режимдерди буйтап өтүүгө байланыштуу болушу мүмкүн болгон операцияларды өз убагында аныктоо үчүн мониторинг жүргүзүүнү улантат.

«АБАНК» ААКсы болжол менен 35 компания менен ишкер мамилелерин токтотту, дагы 40ка жакын компания тиешелүү текшерүү иш-чараларынан өтүүдө.

Мамлекеттик банктар операцияларды жүргүзүүнүн бардык этаптарында көзөмөлдү күчөтүүнү улантат. Төлөмдөрдү жүргүзүүгө негиз болгон документтерди терең текшерүүгө, товарларды жана кызмат көрсөтүүлөрдү алуучуларды аныктоого, ошондой эле жеткирүүлөрдүн багытталган өлкөлөрүн белгилөөгө өзгөчө көңүл бурулат.