Бензин кескин кымбаттоодо: Ысык-Көлгө транспорттун кайсы түрү менен баруу пайдалуу?

Бензиндин баасы дагы да көтөрүлгөндөн кийин унаа менен баруу эң ыңгайлуу тандоо болбой калды. Айрымдар үчүн поезд арзаныраак болсо, электромобиль ээлери «күйүүчү майга» болгон каражатын үнөмдөй алышат. Ал эми эң өзгөчө саякатчылар көлгө дээрлик бекер жетиши мүмкүн, бирок мындай сапар адатта кызыктуу окуялар менен коштолот эмеспи.

16-июлга карата Бишкектеги айрым май куюучу жайларда АИ-92 үлгүсүндөгү бензиндин бир литри болжол менен 79-81 сом, АИ-95 – 85-95 сом, ал эми дизелдик күйүүчү май 94-95 сомдун тегерегинде сатылууда. Ошол эле учурда айрым май куюучу жайларда бензиндин тартыштыгы да байкалууда.

Бензин менен жүргөн унаа

Бишкектен Чолпон-Атага чейинки аралык болжол менен 250 чакырымды түзөт. Демек, барып-келүү аралыгы орто эсеп менен 500 чакырым болот.

Эгер унаа трассада 100 чакырымга 6 литр бензин сарптаса, жолго болжол менен 2 400 сом кетет. Ал эми 8 литр күйүүчү май сарпталган учурда чыгым 3 200 сомдун тегерегинде болот, 100 чакырымга болсо 10 литр же андан көп күйүүчү май колдонгон жол тандабас унаалар үчүн чыгым 4 миң сомдон ашат. Бул эсепке көл жээги, жакынкы айылдагы туугандар, Рух-Ордо маданий борбору же Ысык-Көлдүн кооз капчыгайларына болгон кошумча сапарлар кирген жок.

Эгер унаада төрт адам барса, жол чыгымын бөлүшүп төлөсө болот. Мындай учурда кымбат көрүнгөн сапар да арзанга түшөт.

Газ менен жүргөн унаа

Автогаз эң пайдалуу күйүүчү майлардын бири бойдон калууда. Бир литри болжол менен 44-47 сом болгондуктан, күйүүчү май көбүрөөк сарпталса да, мындай сапар бензинге караганда арзаныраак болушу мүмкүн.

Электр унаалары 

Энергиянын баасы боюнча электромобиль бензин менен жүргөн унаадан кыйла үнөмдүү. Эгер электромобиль 100 чакырымга 15-20 кВт/саат энергия коротсо, 500 чакырымга болжол менен 75-100 кВт/саат энергия талап кылынат.

2026-жылдын 1-майынан тартып кубаттоо станциялары үчүн электр энергиясынын тарифи 1 кВт/саат үчүн 5,99 сомду түзөт. Демек, ушул тариф боюнча эсептегенде, 500 чакырымдык жолго электр энергиясына болжол менен 450-600 сом гана сарпталат.

Бирок жолго чыгардан мурун маршрутту жана кубаттоо станцияларынын жайгашкан жерлерин алдын ала текшерип алуу маанилүү.

Поезд

Жай мезгилинде Бишкек-Балыкчы поезди жалгыз саякаттаган адам үчүн эң арзан варианттардын бири бойдон калууда. 2026-жылы чоңдор үчүн бир тарапка билеттин баасы накталай эмес төлөмдө 150 сомдон, ал эми накталай төлөмдө 180 сомдон башталат. Бир адамдын барып-келүү чыгымы 300 сомдон, ал эми төрт чоң киши үчүн - 1 200 сомдон башталат.

Албетте, мунун да өзүнүн кемчиликтери бар. Балыкчыдан эс алуучу жайга чейин такси, маршруттук каттам же автобус менен жетүүгө туура келет. Өзүңүз менен көп жүк алып жүрүү ыңгайсыз, ошондой эле поезд Бишкектен Балыкчыга чейин болжол менен беш саат жүрөт.

Электросамокат

Эгер электр энергиясынын чыгымын гана эсептесек, сапар бир нече жүз сомго эле түшүшү мүмкүн. Бирок көпчүлүк электросамокаттар бир кубаттоо менен мындай узак аралыкты басып өтө албайт. Жолдо бир нече жолу узакка токтоп, кубаттагыч издеп, бир нече саат күтүүгө туура келет. Мындан тышкары, трассадагы коопсуздук маселеси да маанилүү. Анткени унаалардын ылдамдыгы эрежеге ылайык 90 км/саат болсо, иш жүзүндө андан да жогору болушу мүмкүн.

Моно дөңгөлөк

Заманбап моно дөңгөлөктөр бир кубаттоо менен 150-200 чакырымга чейин жүрө алат. Ошондуктан Балыкчыга бир жолу, ал эми Ысык-Көлдүн түндүк жээгине бир же эки жолу кубаттап жетүүгө мүмкүн.

Бирок мындай сапар тажрыйбалуу райдерлер үчүн гана ылайыктуу. Себеби трассада бир нече саат бою тик туруп жүрүүгө туура келет.

Велосипед

Өз бутуңуздан кийинки эң арзан транспорт дал ушул эмеспи. Күйүүчү майга акча коротпойсуз, бирок жол даярдык деңгээлиңизге жараша эки-төрт күнгө созулат. Негизги чыгымдар - суу, тамак-аш жана түнөп чыгуу.

Жыл сайын Кыргызстан жана башка өлкөлөрдөн ондогон велосипедчилер ушундай сапарга чыгып, жолдун өзүн кызыктуу саякатка айландырышат. Эгер чатыр менен барсаңыз, сапардын чыгымы дээрлик символикалык гана болот.

Эми кайсынысын тандоо керек?

Эгер эң негизгиси – чыгымды азайтуу болсо, анда поезд, велосипед жана электр транспорту эң пайдалуу тандоо болот. Үй-бүлө же компания менен ыңгайлуу саякаттоо маанилүү болсо, анда жеке унаа ылайыктуу, айрыкча чыгымды жүргүнчүлөр ортосунда бөлүшсөңүз. Ал эми жолдун өзүн өзүнчө укмуштуу окуяга айландыргыңыз келсе, Ысык-Көлгө велосипед, электросамокат же моно дөңгөлөк менен да жетүүгө болот. Болгону мындай сапарда акчадан көрө убакыт менен чыдамкайлык көбүрөөк талап кылынат.