Улуу Британия Кыргызстандын үч компаниясына санкция салды

Бул тууралуу Улуу Британиянын ТИМнин санкциялар жөнүндө билдирүүсүндө айтылат.

«38 жаңы категорияга Орусиянын мунай компаниялары, көмүскө флоттун танкерлерлери жана Орусия үчүн өтө маанилүү товарларды жеткирүүчү компаниялар кирет. Биз Орусияга санкцияларды айланып өтүүгө, анын ичинде финансылык кызматтар жана криптовалюта биржалары аркылуу жардам бергендерге карата катуу чараларды көрүп жатабыз», — деп айтылат билдирүүдө.

Улуу Британия Орусияга каршы жаңы санкциялык тизмеге Кыргызстандын үч компаниясын — «ПРОЦЕССИНГ КЕЙДЖИ» ААК, «ЦУНАМИ ПЕЙМЕНТС» ЖЧК, «ТОКЕНСПОТ» ЖАК, ошондой эле «ПРОЦЕССИНГ КЕЙДЖИ» ААКсынын директорун киргизди.

«ПРОЦЕССИНГ КЕЙДЖИ» ААКсы

Британ тараптын негиздемесине ылайык, компаниянын санкциялык тизмеге киргизилишине уюмдун «Орусия өкмөтүнөн пайда көрүп жатканы же ага Орусия үчүн экономикалык мааниге ээ колдоо көрсөтүп жатканы» себеп болгон. Ошол эле учурда билдирүүдө уюмдун башкы компаниясы катары КРнын Финансы министрлиги көрсөтүлгөн.

Санкциялык чектөөлөр төмөнкүлөрдү камтыйт:

• активдерди тоңдуруу;
• трасттык кызматтарды көрсөтүүгө тыюу салуу;
• директорду кызмат ордун ээлөө укугунан ажыратуу түрүндөгү санкциялар;
• интернет кызматтарына карата чектөөлөр;
• британдык финансылык институттар менен корреспонденттик банктык мамилелерди түзүүгө же улантууга тыюу салуу, ошондой эле бардык төлөмдөрдү иштетүүнү бөгөттөө.

Британ бийлиги Орусияга каршы санкциялар режиминин алкагында санкциялык тизмеге КРнын жараны, «ПРОЦЕССИНГ КЕЙДЖИ» ААКсынын директору Улан Букабаевди киргизди.

Британ тараптын расмий негиздемесине ылайык, анын санкциялык тизмеге киргизилишине Орусия өкмөтү үчүн экономикалык мааниге ээ ишмердүүлүк жүргүзүп жатканы себеп болгон.

Улан Букабаевге карата бир катар жеке санкциялар киргизилди:

• активдерди тоңдуруу;
• Улуу Британияга кирүүгө тыюу салуу;
• трасттык кызматтарга байланыштуу санкциялар;
• директорлук кызматты ээлөөгө тыюу салуу (кызмат ордун ээлөө укугунан ажыратуу).

«ЦУНАМИ ПЕЙМЕНТС» ЖЧКсы

Орусия менен байланышкан жактарга жана түзүмдөргө карата санкциялык тизмеге «ЦУНАМИ ПЕЙМЕНТС» жоопкерчилиги чектелген коому да киргизилди.

Чектөөлөрдү киргизүүгө уюм Орусия өкмөтү үчүн стратегиялык мааниге ээ финансылык кызмат көрсөтүүлөр секторунда иш жүргүзүп жатат деген күмөн  негиз болгон.

Санкциялык чектөөлөрдүн катарына төмөнкүлөр кирет:

• активдерди тоңдуруу;
• трасттык кызматтарга байланыштуу санкциялар;
• директорду кызмат ордун ээлөө укугунан ажыратуу;
• интернет кызматтарына байланыштуу санкциялар;
• корреспонденттик банктык мамилелерди түзүүгө же улантууга жана төлөмдөрдү иштетүүгө тыюу салуу.

«ТОКЕНСПОТ» ЖАКсы

Улуу Британиянын өкмөтү санкциялык тизмени кеңейтип, ага «ТОКЕНСПОТ» ЖАКсын киргизди. Британ тараптын маалыматына ылайык, чектөөлөрдү киргизүүгө компания Орусия өкмөтү үчүн стратегиялык мааниге ээ финансылык кызмат көрсөтүүлөр секторунда иш жүргүзүп, андан пайда көрүп жатат деген негиз себеп болгон.

Санкциялык чектөөлөрдүн катарына төмөнкүлөр кирет:

• активдерди тоңдуруу;
• трасттык кызматтарга байланыштуу санкциялар;
• директорду кызмат ордун ээлөө укугунан ажыратуу;
• корреспонденттик банктык мамилелерге жана төлөмдөрдү иштетүүгө байланыштуу чектөөлөр.

Чектөөлөрдүн географиясы

Мындан тышкары, «Столичный кредит» коммерциялык банкына, «Планета» АКсына, ошондой эле «Прайм Топ», «Фобос машинс», «Трэк», «Энэл», «Сидас», «Альбион» жана башка орусиялык уюмдарга карата чектөөлөр киргизилди.

Санкцияларга Кытайдын компаниялары, Таиланддан, Канададан жана Түркиядан келген фирмалар, ошондой эле 12 соода кемеси кабылды. Улуу Британия өкмөтүнүн билдирүүсүндөгү маалыматка ылайык, учурда санкцияга кабылган танкерлердин жалпы саны 600дөн ашты.

Эске салсак, 2025-жылдын февраль айында «Керемет Банк» ААКсы Улуу Британиянын санкцияларына кабылган. Ал эми 2025-жылдын августунда Улуу Британиянын Финансылык санкцияларды көзөмөлдөө башкармалыгы (OFSI) «Борбор Азия Капитал Банкы» ААКсын жаңыланган санкциялык тизмеге киргизген.