Эл арзан бензин алыш үчүн мамлекет 1 млрд сомдой каражатты субсидиялады

Монополияга каршы кызмат түшүндүргөндөй, мунай трейдерлери күйүүчү майды белгиленген баалар боюнча сатышат, ал эми анын иш жүзүндөгү наркы менен керектөөчү үчүн баанын ортосундагы айырманы мамлекет компенсациялайт.

Жөнөкөй сөз менен айтканда, айдоочулар бензиндин реалдуу баасын төлөбөйт – ортодогу айырмачылык бюджеттен төлөнүүдө.  

Иш жүзүндөгү нарк менен белгиленген баанын ортосундагы айырма төмөнкүдөй:

• АИ-92: үлгүсүндөгү бензиндин чыныгы баасы 111-118 сом, бирок сатыктагы баасы 87,9 сомдон болууда. Ортодогу 23,1-30,1 айырманы мамлекет берип жатат.
• Дизель отуну: реалдуу баасы 125-137 сом, айдоочулар үчүн баа – 99,9 сом. Кенемте литрине 25,1–37,1 сомду түзөт.
• Автогаз: реалдуу баа 51-54 сом, айдоочулар үчүн баа – 48,8 сом. Ортодогу айырмачылыкка мамлекет литрине 2,2-5,2 сом төлөйт.

Маалыматка ылайык, бүгүнкү күнгө карата мунай трейдерлерине болжол менен 1 миллиард сом субсидия төлөнүп берилди.

Жөнөкөй мисал алалы: эгерде автоунаа күнүнө 10 литр бензин сарптаса, ал эми мамлекеттик компенсация орто эсеп менен литрине болжол менен 26,6 сомду түзсө, мамлекет мындай автоунаа ээсине күн сайын болжол менен 266 сом, же айына болжол менен 7 980 сом компенсациялайт.

Ошол эле учурда, Кыргызстанда күйүүчү майдын баасы салыштырмалуу төмөн бойдон калууда.

Монополияга каршы кызматтын маалыматы боюнча, 17-августка карата Бишкекте АИ-92 күйүүчү майынын баасы литрине 87,9 сомду түздү, ал эми Казакстанда — 47,4 сом, Орусияда — 72,1 сом, Беларуста — 76,4 сом, Тажикстанда — 127,5 сом жана Өзбекстанда — 99,9 сом болгон.

19-августка карата Бишкекте AИ-92 үлгүсүндөгү бензиндин баасы Кытай, Пакистан, Индия, Түркия, Монголия жана Ооганстандагыга караганда төмөн болгон. Баасы мындан төмөн болгон жалгыз өлкө Азербайжан - литрине болжол менен 59,1 сом.

Аталган кызмат айдоочуларга кайрылып, күйүүчү майды жөнү жок коротуудан алыс болууга чакырды. Жакын жердеги дүкөнгө же окуу жайга баруу үчүн дайыма эле унаанын кереги жок, кээде жөө басуу же коомдук транспортту колдонуу үй-бүлө үчүн да, өлкө үчүн да арзаныраак болот.