Кыргызстанда томолой жетим балдар жашы жеткенде жарым миллион сомдон алышат

Бул тууралуу Эмгек министрлигинен билдиришти.

Аталган программанын катышуучуларынын бири Бишкектин тургуну болду. Ата-энесинин көзү өткөндөн кийин ал карындаштары менен жалгыз калган. Эмгек, социалдык камсыздоо жана миграция министрлигинин орун басары Аида Исатбек кызы алардын жашоо-шарты менен таанышты. Белгиленгендей, мамлекеттик колдоонун арты менен алар үйүн оңдоп-түзөп, күнүмдүк жашоолорун жакшыртууга шарт түзүлгөн.  

Министрдин орун басарынын айтымында, аталган программа жетим балдарга билим алууга, жашоо шартын жакшыртууга жана келечекке ишенимдүү максаттарды коюуга жардам берет. 

«Келечекке салым» мамлекеттик депозити 2024-жылдын апрель айында президенттин жарлыгы менен түзүлгөн. Программага ылайык, мамлекет 18 жашка чыккан ар бир жетим бала үчүн депозиттик эсепке 500 миң сомдон которот.

Эмгек министрлигинин маалыматы боюнча, 2026-жылдын 1-майына карата депозиттер өлкө боюнча 3524 балага ачылган. 80ге жакын катышуучу каражатты билим берүүгө, дарыланууга же турак жай шарттарын жакшыртууга жумшашкан.