Эми муздаткыч, сыналгы жана кир жуучу машиналарга байкоо жүргүзүлөт

Мамлекеттик салык кызматынан билдиришкендей, аталган система салыктык башкарууну санариптештирүүнүн, ошондой эле Кыргызстандын Евразия экономикалык биримдигинин алкагындагы эл аралык милдеттенмелерди аткаруу максатында киргизилген.

Негизги өзгөртүүлөрдүн бири - товарлардын көпчүлүк категориялары үчүн электрондук товардык-транспорттук коштомо кагазды (ЭТТК) милдеттүү түрдө колдонуу талабынын жоюлушу.

Мында товарлардын айрым категориялары боюнча ЭТТКнын функциялары «Электрондук эсеп-фактура 2.0» (ЭЭФ 2.0) модулу аркылуу ишке ашырылат. Ал тиешелүү товарлардын жүгүртүлүшүн электрондук түрдө тариздөөнү жана көзөмөлдөөнү камсыз кылат.

ЭЭФ 2.0 товарлардын кыймылын эсепке алуу жана көзөмөлдөө үчүн гана колдонулат, салыктык милдеттенмелерди эсептөө жана аткаруу тартибин өзгөртпөйт.

Кайсы товарларга байкоо жүргүзүлөт?

Байкоо жүргүзүү механизми Кыргызстандын мыйзамдарында жана эл аралык милдеттенмелеринде тиешелүү эсепке алуу жана көзөмөлдөө тартиби каралган товарларга гана карата колдонулат.

Тактап айтканда, система Евразия экономикалык бирлигинин бажы аймагына алып келинген товарларга байкоо жүргүзүү механизмдери жөнүндө макулдашуунун талаптарына кирген товарлардын айрым категорияларына карата колдонулат. 

Алардын ичинде:

• муздаткычтар жана тоңдургучтар;
• кир жуучу машиналар;
• телевизорлор;
• теле-, видео жана башка тиричилик техникалары.

Товарларга байкоо жүргүзүү системасы өнөр жай эксплуатациясына киргизилген жана ЭЭФ 2.0 колдонуу боюнча пилоттук долбоорго кирбейт.

Ишканаларга товар калдыктарын жана каталогун текшерүү сунушталат

Виртуалдык калдыктарды иш жүзүндөгү калдыктарга шайкеш келтирүү талабы негизги каражат катары пайдаланууга сатып алынган жана мындан ары кайра сатууга арналбаган товарларга карата колдонулбайт.

МСК ишкердик субъекттерине сатылып жана пайдаланылып жаткан товарларды Салык кызматынын товарлар каталогуна киргизүүнү камсыз кылууну сунуштайт.

Товарлар каталогундагы маалыматтардын толуктугуна жана тууралыгына импорттоочулар жана ата мекендик өндүрүүчүлөр өзгөчө көңүл буруусу зарыл. Анткени товарлар жөнүндө маалыматтардын актуалдуулугу электрондук документтерди туура түзүүнүн жана товарларга байкоо жүргүзүү системасынын натыйжалуу иштешинин маанилүү шарты болуп саналат.

Салык кызматы салыктык башкаруунун санариптик куралдарын өркүндөтүү жана товарларды электрондук эсепке алуунун жана аларга байкоо жүргүзүүнүн заманбап механизмдерине өтүүнү камсыз кылуу боюнча иштерди улантууда.