Кыргызстандын эки банкы дүйнөлүк каржылык гигант Citibank менен макулдашууга кол коюшту

Президенттик администрациядан билдиришкендей, жолугушуунун алкагында финансылык жана банктык кызматташтыкты мындан ары өнүктүрүүнүн келечеги, анын ичинде эл аралык эсептешүүлөр тууралуу кеп козголду.  

Ошондой эле инвестициялык өз ара аракеттенүү жана кыргыз банктарына эл аралык финансылык инфраструктуранын жеткиликтүүлүгүн кеңейтүү маселелери каралды.

Кыргызстандын банк секторунун эл аралык капитал рынокторуна чыгышында кыргыз банктарынын Citibank менен кызматташуу тажрыйбасы белгиленди,  ошондой эле республикада америкалык банктын филиалын ачуу келечегин талкуулашты.

Citibank корпоративдик кардарларга, финансылык уюмдарга жана мамлекеттик түзүмдөргө кызмат көрсөтүүлөрдүн кеңири спектрин сунуштаган алдыңкы эл аралык финансылык институттардын бири. Банк 180ден ашуун өлкөдө жана юрисдикцияда өкүлчүлүгү бар Citigroup финансылык тобунун курамына кирет.

2026-жылдын апрель айында мамлекеттик «Элдик Банк» Citigroup компаниясынын келишимдин негизги уюштуруучуларынын жана букраннерлеринин бири катары катышуусунда 500 млн АКШ доллары өлчөмүндө алгачкы еврооблигацияларын жайгаштырган.

Садыр Жапаров маектештерине Кыргызстанда ишке ашырылып жаткан «Кытай-Кыргызстан-Өзбекстан» темир жолун, «Камбар-Ата-1» ГЭСин, «Асман» экошаарын жана «Ала-Тоо Резорт» тоо-лыжа кластерин куруу сыяктуу масштабдуу долбоорлор тууралуу айтып берди.

Президент азыркы учурда Citibank менен практикалык кызматташтыкты өнүктүрүү абдан пайдалуу болорун айтты.

Өз кезегинде Citibank өкүлдөрү буга чейин Кыргызстан менен ийгиликтүү кызматташып келгенин ырастап, жакынкы келечекте Кыргызстандын мамлекеттик банктары менен корреспонденттик мамилелерди түзүүгө кызыкдарлыгын жана банктын өлкөдө ишке ашырылып жаткан долбоорлорго катышуу мүмкүнчүлүктөрүн карап чыгуу ниеттенерин билдиришти.

Жолугушуунун жыйынтыгында төмөнкү документтерге кол коюу аземи болуп өттү:

• Кыргызстандын Финансы министрлиги менен Citibank ортосундагы өз ара түшүнүшүү жөнүндө меморандум;
•  «Элдик Банк» ААК менен Citibank ортосундагы өз ара түшүнүшүү жөнүндө меморандум;
•  «АБанк» ААК менен Citibank ортосундагы өз ара түшүнүшүү жөнүндө меморандум.