Wildberries кенемтенин экинчи этабын которду: төлөмдөрдү дээрлик 100 миңдей сатуучу алды

Бул тууралуу Banks.kg сайтына Wildberries Кыргызстан билдирди.

Wildberries өзүнүн логистикалык объектилерине жасалган чабуулдардын кесепеттерин этап-этабы менен компенсациялоону улантууда. Компания окуялардын кесепетинен товарлары жараксыз болгон же жоголгон сатуучулар үчүн колдоо төлөмдөрүнүн экинчи траншын жүргүзгөнүн маалымдады.

Экинчи этапка чакан жана орто бизнестин 97 миңден ашуун ишкери кирди. Алардын арасында биринчи транш боюнча төлөм алган сатуучулар да бар. Каражаттар өнөктөштөрдүн платформадагы балансына которулат. Андан кийин алар белгиленген төлөм графигине ылайык кадимки тартипте чыгарып ала алышат.

Эске салсак, биринчи транш 88 миңден ашуун ишкерге которулган. Анда төлөмдүн өлчөмү окуя болгон учурдагы товарлардын баасы жана кампадагы калдыгынын негизинде, башкача айтканда товар ийгиликтүү сатылгандай эсептелип чыгарылган. Биринчи этапта компания мүмкүн болушунча көп жабыркаган сатуучуларды тез арада камтуу үчүн товар калдыгы аз болгон ишкерлерге да колдоо көрсөткөн.

Wildberries компаниясынын логистикалык комплекстерине жасалган чабуулдар өткөн жумада башталган. Чабуулдар Электросталь, Котовск, Краснодар аймактарындагы кампаларга, кийинчерээк Шушары, Уткина Завод жана Симферополдогу кампаларга жасалган. Краснодарда жергиликтүү бийликтин маалыматына ылайык, бир адам каза болгон. Wildberries компаниясынын негиздөөчүсү Татьяна Ким буга чейин каза болгон кызматкердин үй-бүлөсүнө 2 млн рубль, ал эми оор абалда жабыркагандарга 1 млн рублдан төлөнөрүн билдирген.

Ошол эле учурда маркетплейс логистикалык тармагын калыбына келтирип, товарларды кампалар арасында кайра бөлүштүрүп, өнөктөштөр үчүн ыкчам маалыматтарды сатуучулардын порталында жарыялоону улантууда.

Түз компенсациялык төлөмдөрдөн тышкары, Wildberries бизнес үчүн кошумча колдоо чараларын да ишке киргизди. Компания сатып алуучулар үчүн арзандатууларга өз инвестицияларын көбөйтүп, сатуучуларга сатуунун көлөмүн сактап калууга жардам берүү үчүн товарларды сактоо жана логистика боюнча жеңилдетилген шарттарды сунуштады. Өз кезегинде WB Банк жабыркаган ишкерлер үчүн насыялык каникулдарды киргизип, ошондой эле Wildberries сатуучулары үчүн эсепти тейлөө акысын жана рубль менен жүргүзүлгөн которуулар боюнча комиссияларды жокко чыгарды.

Кыргызстан үчүн бул жагдай өзгөчө мааниге ээ. Орусиялык маркетплейс ата мекендик кийим-кече, үй-тиричилик товарлары, косметика жана башка продукция өндүрүүчүлөр үчүн негизги экспорттук каналдардын бири бойдон калууда. Wildberries буга чейин Кыргызстанды Борбор Азиядагы артыкчылыктуу рыноктордун бири катары карай турганын жана жергиликтүү ишкерлер менен кызматташууну өнүктүрүүнү улантарын бир нече жолу билдирген. Мындай шартта товарларынан кол жууган сатуучуларга өз убагында колдоо көрсөтүү өзгөчө мааниге ээ болуп жатат.

Компания жардам көрсөтүү программасы мындан ары да улантыларын белгиледи. Wildberries төлөмдөрдүн кийинки этаптары жана өнөктөштөрдү колдоонун кошумча чаралары тууралуу расмий каналдары жана сатуучулардын порталы аркылуу маалымдап турары кошумчаланды.