Банктардын эскилиги жете элек нак чет өлкө валютасын сыртка алып чыгууга берилген уруксаттын мөөнөтү дагы узартылды

Бул тууралуу КРнын Улуттук банкынын маалымат кызматынан билдиришти. 

Улуттук банк Башкармасынын «Кыргыз Республикасынын коммерциялык банктарына эскилиги жете элек нак чет өлкө валютасын сыртка алып чыгууга убактылуу уруксат берүү жөнүндө» токтомуна өзгөртүүлөр киргизилип, коммерциялык банктарга 2026-жылдын 1-октябрына чейин эскилиги жете элек нак АКШ долларын сыртка алып чыгууга уруксат берилди.  

Эске салсак, КРнын Улуттук банкы 2025-жылдын 14-июлунда комбанктарга эскилиги жете элек нак чет өлкө валютасын сыртка алып чыгууга 2025-жылдын 1-октябрына чейин уруксат берген. Ал «Кыргыз Республикасынын коммерциялык банктарына эскилиги жете элек нак чет өлкө валютасын сыртка алып чыгууга убактылуу уруксат берүү жөнүндө» токтому менен бекитилген. 

Андан соң, КРнын комбанктарына эскилиги жете элек нак чет өлкө валютасын сыртка алып чыгууга убактылуу уруксат берүү мөөнөтү дагы жарым жылга, тагыраагы 2026-жылдын 1-апрелине чейин узартылган.