Батир убада кылып, акча менен кошо жоголуп кеткен: курулуш компаниянын башкы директору кармалды

Бул тууралуу Бишкек ШИИИББнын басма сөз кызматы билдирди. 

Анда Октябрь районунун ички иштер башкармалыгына А.К. аттуу жаран арыз менен кайрылып, жоопкерчилиги чектелген коомдордун биринин башкы директору Э.Н. аттуу жаранга карата чара көрүүнү өтүнгөн. Арыз ээсинин айтымында, шектүү 2021-жылдын апрель айынан 2025-жылдын май айына чейинки мезгилде анын ишенимине кирип, борбор калаада курулуп жаткан көп кабаттуу үйлөрдүн биринен эки бөлмөлүү батир берүүнү убада кылуу менен 2 миллион 924 миң 986 сом өлчөмүндөгү акча каражатын ээлеп алган.

Кийинчерээк арыз ээсине үлүштүк курулуш келишимин башка курулуш компаниясына кайра тариздөө сунушталган. Бирок бүгүнкү күнгө чейин убада кылынган батир берилген эмес жана келтирилген материалдык зыяндын орду толтурулган эмес.

Бул факты боюнча Кылмыш-жаза кодексинин 209-беренеси («Алдамчылык») менен кылмыш иши козголгон.

Жүргүзүлгөн издөө иш-чараларынын жүрүшүндө милиция кызматкерлери тарабынан 1987-жылы туулган Э.Н. аттуу жаран аныкталып, Бишкек ШИИББнын Тергөө кызматына жеткирилген. Шектүүгө карата бөгөт коюу чарасы катары камакка алуу тандалып, Бишкек шаарындагы №1 тергөө абагына киргизилген. Учурда окуянын бардык жагдайларын аныктоого багытталган тергөө амалдары жүргүзүлүүдө.

Бишкек ШИИББи жарандарды үлүштүк курулуш боюнча келишимдерди түзүүдө сак болууга, курулуш компанияларынын документтерин жана ишмердүүлүгүнүн мыйзамдуулугун кылдат текшерүүгө чакырат.