Долбоорго ылайык, илим докторлору үчүн ай сайын берилүүчү үстөк акы 2 700 сомдон 5 400 сомго чейин, ал эми илим кандидаттары, философия докторлору (PhD) жана профили боюнча докторлор үчүн 1 350 сомдон 2 700 сомго чейин көбөйүшү мүмкүн.
Министрлик бул демилге илимий жана илимий-педагогикалык кызматкерлерди колдоого, алардын изилдөөлөрдү жүргүзүүгө жана илимий кадрларды даярдоого болгон материалдык кызыкчылыгын жогорулатууга, ошондой эле өлкөнүн илимий дараметин сактоого багытталганын түшүндүрдү.
Министрликтин эсептөөлөрүнө ылайык, төлөмдөрдүн көбөйүшү 4 968 адамды камтыйт. Алардын ичинен 1 038 - илим докторлору, 3 662 - илим кандидаттары жана 268 - философия докторлору (PhD) жана профили боюнча докторлор.
Демилгени ишке ашыруу үчүн республикалык бюджеттен жылына кошумча 97,3 млн сом талап кылынат. Ошентип, үстөк акыларды төлөөгө болгон жылдык каржылоо муктаждыгы 97,3 млн сомдон 194,6 млн сомго чейин көбөйөт.
Токтом кабыл алынган учурда бир кызматкерге карата кошумча чыгымдар илим доктору үчүн жылына 32 400 сомду, ал эми илим кандидаты, философия доктору (PhD) же профили боюнча доктор үчүн 16 200 сомду түзөт.
Мамлекеттик мекемелерде төлөмдөр республикалык бюджеттин эсебинен жүргүзүлөт. Чарбалык эсептин негизинде иштеген уюмдар үстөк акыларды өз каражаттарынын эсебинен төлөшөт.
Эске салсак, Кыргызстанда 2026-жылдын январь–август айларында орточо эмгек акы 55 миң 79 сомду түзгөн.
Ошондой эле президент Садыр Жапаров укук коргоо органдарынын кызматкерлеринин жана аскер кызматкерлеринин акчалай камсыздоосун жогорулатуу жөнүндө жарлыкка кол койгон.
Комментарийлер
Азырынча комментарий жок
Комментарий калтырган биринчи болуңуз!
Комментарий калтыруу үчүн авторизациядан өтүңүз керек.