Кыргызстанда мораторий учурунда тарифтерди жогорулатуу эрежелери бекитилди. Документке ылайык, министрлер кабинети калк үчүн тарифтерди, жыйымдарды жана кызмат көрсөтүүлөрдүн наркын жогорулатууга убактылуу киргизилген мораторийден өзгөчөлүктөрдү колдонуу тартибин бекитти. Чечим 22-сентябрда №634 токтом менен кабыл алынган.
Эми Монополияга каршы жөнгө салуу кызматы мораторийден өзгөчөлүктөр боюнча кайрылууларды карап чыгып, расмий корутундуларды берет. Ошол эле учурда кызматтын өзү тарифтерди бекитпейт же макулдашпайт – бул тиешелүү мамлекеттик органдардын жана жергиликтүү бийлик органдарынын компетенциясында калат.
Мораторий учурунда тарифтерди жогорулатууга мыйзамда каралган учурларда, тиешелүү мыйзамдуу ыйгарым укуктар жана монополияга каршы жөнгө салуу кызматынын корутундусу болгондо гана жол берилет.
Буга чейин Садыр Жапаров калк үчүн айрым тарифтерди, жыйымдарды жана кызмат көрсөтүүлөрдүн наркын жогорулатууга бир жылдык мораторий киргизүү тууралуу жарлыкка кол койгон.
Ошондой эле Экономика министрлиги 2026–2027-жылдарга товарлардын жана кызмат көрсөтүүлөрдүн бааларын турукташтыруу боюнча министрлер кабинетинин планынын долбоорун иштеп чыккан.
Комментарийлер
Азырынча комментарий жок
Комментарий калтырган биринчи болуңуз!
Комментарий калтыруу үчүн авторизациядан өтүңүз керек.