Улуттук банк «Почта Банк» ААКсын түзүүгө уруксат берди

Бул тууралуу Улуттук Банктын басма сөз кызматы билдирди. 

«Кыргыз почтасы» ААКнын башкы директору Марат Черикчиевдин айтымында, Банктын негизги максаты - республика боюнча финансылык жеткиликтүүлүктү арттыруу жана банктык кызматтарды өнүктүрүү.

«Почта Банктын» түзүлүшү «Кыргыз почтасы» ААКтын өнүгүүсүндөгү жаңы этапты белгилеп, калкка заманбап финансылык кызматтарды көрсөтүүдөгү компаниянын ролун бекемдейт жана ага өзүнүн социалдык милдетин, анын ичинде алыскы аймактардын тургундарына пенсияларды жана социалдык жөлөк пулдарды жеткирүүнү улантууга мүмкүндүк берет. 

2026-жылдын июль айында «Почта Банк» долбоору бекитүү процессинен жана зарыл болгон жөнгө салуучу жол-жоболордон өтүп жатканы кабарланган. «Почта Банк» «Кыргыз почтасы» ААКсы менен өнөктөштүктө көз карандысыз банк катары түзүлүүдө. «Почта Банкты» Кыргызстанда 2027-жылдын башында ишке киргизүү белгиленген.

Эскерте кетсек, 2024-жылдын март айында Кыргыз Республикасынын өкмөтү Кыргызстанда жаңы банкты түзүү маселеси боюнча кытайлык компания менен кошумча сүйлөшүүлөрдү жүргүзгөн. Жолугушуу министрлер кабинетинин мурдагы төрагасы Акылбек Жапаров менен кытайлык «Sichuan Hongxinde Equity Investment Fund Management Co.», Ltd компаниясынын өкүлдөрүнүн ортосунда өткөн. Тараптар «Кыргыз почтасы» ААКсынын ишмердүүлүгүнүн негизинде «Почта-Банк» түзүү маселесин талкуулашкан.

Белгиленгендей, «Почта Банк» ишке киргизилгенден кийин «Кыргыз почтасы» ААКсына караштуу объекттер модернизациялоодон, реконструкциялоодон же жаңы курулуштан өткөрүлөт. Талкуу бизнес-процесстерди автоматташтырууга жана санариптештирүүгө, ошондой эле калк жана бизнес коомчулугу үчүн жеткиликтүү, көп функциялуу тейлөө борборлорун түзүүгө багытталган.

Ошол эле учурда, «Кыргыз почтасы» мамлекеттик ишканасы 2020-жылдын декабрынан тарта накталай эмес каржылык кызматтарды көрсөтө баштаган.