Кыргызстанда дээрлик 300дөй компания мамбанктардын кызматтарын колдонуу мүмкүнчүлүгүнөн ажырады

5-ноябрда президенттин санкциялык саясат жана санкциялык тобокелдиктерди минималдаштыруу маселелери боюнча атайын өкүлү Бакыт Сыдыковдун төрагалыгы алдында тышкы экономикалык ишмердүүлүктүн жана санкциялык тобокелдиктери жогору операциялардын ак ниетсиз катышуучуларын аныктоо боюнча ведомстволор аралык жумушчу топтун кезектеги жыйыны болуп өттү.

Жыйындын жүрүшүндө мамлекеттик органдардын санкциялык тобокелдиктери жогору юридикалык жактарды аныктоо жана текшерүү боюнча ишинин жыйынтыктары, ошондой эле тиешелүү тизмени түзүү жана колдонуу маселелери каралды.

5-ноябрга карата «АБанк» ААКсы ишмердүүлүгү санкциялык тобокелдиктери жогору болгон 115 компания менен ишкердик мамилелерин токтотту. Болжол менен 37 компания мониторинг баскычында турат.

«Элдик Банк» ААКсы 169 компания менен ишкердик мамилелерин токтотту. Дагы төрт компания текшерүү баскычында турат.

Өзүнчө эл аралык өнөктөштөр, анын ичинде Европа биримдиги, АКШ жана Улуу Британия менен өз ара аракеттенүү маселелери талкууланды.

Бакыт Сыдыков санкцияларга байланыштуу тобокелдиктерди өз убагында аныктоо жана азайтуу үчүн мамлекеттик органдардын, финансылык жөнгө салуучулардын жана банктардын ортосундагы кызматташтыктын маанилүүлүгүн баса белгиледи.

Жыйынтыгында финансы системасынын ачыктыгын жогорулатуу, ведомстволор аралык координацияны жакшыртуу жана эл аралык өнөктөштөр менен диалогду өнүктүрүү боюнча мындан аркы чаралар аныкталды.