Бишкекте доллар жетишсизби? Алмашуу бюросу маалыматты четке какты

Ассоциациянын төрагасы Марс Смайылбековдун айтымында, акча алмаштыруучу жайларда доллар бар жана бардык пункттар кадимки тартипте ишин улантууда.

«Эгер бир же эки акча алмаштыруучу жайда керектүү сумма табылбай калса, бул бүтүндөй шаар боюнча валюта жок дегенди билдирбейт», - деди ассоциациянын төрагасы Марс Смайылбеков.

Учурда акча алмаштыруучу жайларда доллардын курсу 87,85 сомду, ал эми коммерциялык банктарда - 87,80 сомду түзүүдө. Алардын ортосундагы айырма болгону 5 тыйын.

Курс бир аз жогору болгонуна карабастан, жашоочулардын көбү  валютаны акча алмаштыруучу жайлардан сатып алууну туура көрүшөт. Бул рыноктун аталган сегментинде накталай долларга болгон суроо-талапты колдоп турат.

Ассоциация айрым акча алмаштыруучу жайлардагы жагдайдын негизинде валюта тартыштыгы тууралуу жыйынтык чыгарбоого чакырды.