ШКУ учурунда Ысык-Көлдө кантип үнөмдүү эс алса болот: миссия аткарылат

Жайгашкан жерине маани бериңиз 

Эгер мейманкана көлдүн жээгинде жайгашса, анда баасы да кымбатыраак болот. Ал эми пляждан бир нече мүнөттүк аралыктагы конок үйлөрү бир жарым-эки эсеге чейин арзан болушу мүмкүн. Жээкке чейин беш мүнөт жөө басуу үнөмдөлгөн миңдеген сомго арзыйт.

Өтө белгилүү эмес курортторду тандаңыз

Чолпон-Ата менен Бостери адаттагыдай эле эң көп суроо-талапка ээ. Бирок Кара-Ой, Булан-Сөгөттү, Тамчы, Сары-Ой айылдарынан, ошондой эле түштүк жээктен да баасы жеткиликтүү турак жай табууга болот. Ал жактагы көл жээктер деле жогорудагы жактардан кем калбайт.

Алдын ала ээлеп коюуңуз 

Ири иш-чаралар учурунда бош орундар азайып, баалар адатта өсөт. Турак жайды канчалык эрте ээлесеңиз, ылайыктуу баада жакшы вариант табуу мүмкүнчүлүгү ошончолук жогору болот.

Жергиликтүү тургундар тамактанган жерден тамактаныңыз

Жээктеги тамактануучу жайлар кооз болгону менен кымбат. Анын ордуна ашканалар, айыл ичиндеги чакан кафелер же конок үйлөрүндөгү үй шартындагы тамактар алда канча пайдалуу. Порциялары чоң, баалары жеткиликтүү, ал эми даамы көп учурда андан да жакшы болот.

Чыгымдарды бөлүштүрүңүз

Эгер досторуңуз менен бара жатсаңыз, өзүнчө бөлмөлөрдүн ордуна толугу менен бир үйдү же коттеджди ижарага алыңыз. Мындай учурда ар бир адамга туура келген чыгым кыйла төмөн болушу мүмкүн.

Көңүл ачууга үнөмдөңүз

Ысык-Көлдөгү эң башкы көңүл ачуу – көлдүн өзү, ал эми андан ырахат алуу акысыз. Сууга түшүү, жээк бойлой сейилдөө, күндүн батышына суктануу жана тоонун кооз көрүнүштөрүнө көз салуу кошумча чыгымды талап кылбайт. Ал эми кайык, катер, гидроцикл жана башка аттракциондорго түшөрдө баасын алдын ала сүйлөшүп алган оң.

Үнөмдүү эс алуу канчага түшүшү мүмкүн?

Кааласаңыз төмөнкүдөй чыгым менен эс алууга болот:

• турак жай - бир адамга 1 500-3 000 сомдон; 
• тамак-аш - күнүнө 1 000-1 500 сомдун тегерегинде; 
• көл жээги жана сейилдөө - акысыз; 
• көңүл ачуу - каалооңузга жараша. 

ШКУ учурунда эс алуунун эң негизги эрежеси: «асман чапчыган баалар» тууралуу кептерге ишене бербөө. Эгер сапарыңызды алдын ала пландап, турак жайды туура тандасаңыз, Ысык-Көл мурдагыдай эле жайкы эс алуу үчүн эң жеткиликтүү жайлардын бири бойдон кала берет.