Күйүүчү май жана дизелдин баасы асманга чыгууда. Бийлик бааны кармап калуу жолун ойлоп тапты

Экономика министрлиги күйүүчү майдын баасын турукташтыруу чаралары боюнча токтом долбоорун коомдук талкууга койду. Документте АИ-92 үлгүсүндөгү бензинге жана дизелдик отунга кошумча нарк салыгын жана акциздик салыкты убактылуу төмөндөтүү каралган.

Долбоорго ылайык, 2026-жылдын 15-майынан 30-сентябрына чейин төмөндөгүлөр сунушталууда:

• АИ-92 үлгүсүндөгү бензинге КНС 8% өлчөмүндө белгилөө;
• дизелдик отунга КНСти алып салуу;
• АИ-92ге акциз салыгын тоннасына 3000 сомго чейин төмөндөтүү;
• дизелдик отунга акциздик салыкты алып салуу.

Экономика министрлиги бул чаралар баанын өсүшүн ооздуктоого, күйүүчү майдын таңсыктыгын болтурбоо жана рыноктун туруктуулугуна коркунуч туудурган тобокелдиктерге ыкчам чара көрүүгө багытталганын билдирди.

Ошондой эле мунайдын жана мунай продуктуларынын айрым түрлөрүн автотранспорт менен алып кирүүгө тыюу салууну убактылуу токтотуу сунушталууда.

Долбоор министрлер кабинетинин тапшырмасы боюнча Салык кызматы менен биргеликте иштелип чыккан.