Казакстандагы кайрымдуулук фондунун жетекчисинин жомоктогудай жашоосу 10 жылдык абак менен аяктады

ЖМКдын маалыматы боюнча, экөө тең эркинен ажыратылды: сот аталган кайрымдуулук фонддун жетекчиси Перизат Кайратты - 10 жылга, анын апасы Гайни Алашбаеваны - 7 жылга эркинен ажыратуу тууралуу өкүм чыгарды. Ошондой эле үй-мүлкү конфискацияланмакчы.

Перизат Кайрат былтыр ноябрда кармалган. Ага алгач 2024-жылы жазында Казакстанда селден жапа чеккен жарандарга жардам иретинде чогултулган акчаны кымырып алган деген айып тагылган. Көп өтпөй Палестин эли үчүн чогулган каражатка байланыштуу дагы айып тагылганы белгилүү болгон, анда жалпы 3,5 миллиард теңге (2024-жылдын аягы боюнча евронун курсу менен 7 миллион евро жеке муктаждыктарга коротулган).

Финансылык мониторинг агенттигинин маалыматына ылайык, Перизат Кайрат коомчулуктан чогулган акчага Астанадан кымбат батирлерди, люкс машиналарды жана кымбат баалуу буюм-тайымдарды сатып алган. Ошондой эле тынбай саякаттап, кымбат мейманканаларда токтоп жүргөн.

Мындан тышкары Перизат Кайрат мамлекеттик сыйлыгынан да ажыратылды. Ал эми айыпталуучулар күнөөлөрүн моюнга алышкан эмес.

Кайрымдуулук сектор үчүн кесепеттер: 

Бул чуулгандуу окуя жана козголгон кылмыш иши казак коомчулугунда талкуу жаратты. Вице-премьер Ермек Кошербаевдин айтымында, өлкөдө кайрымдуулук иштерин мамлекеттик жөнгө салуу долбоору иштелип чыгууда. Анын максаты – ачыктыкты камсыз кылуу жана жарандардын ишениминен кыянаттык менен пайдаланууну алдын алуу.

Президенттик программаларды колдоо фондунун жетекчисинин орун басары Тимур Досумбеков белгилегендей, бул иш жалпысынан кайрымдуулук уюмдарына болгон ишенимге олуттуу сокку урду. Анын айтымында, тармактын имиджи эле эмес, акча которуулар жүргүзүлгөн банктардын да аброю жабыркады.

Маалымат үчүн: Biz Birgemiz фонду 2021-жылы июнда ыктыярчылардын бүткүл улуттук кыймылы катары түзүлгөн жана катарында 15 миңден ашык ыктыярчы бар экени айтылган.