Сиздин атыңызга башка бирөө насыя алган-албаганын кантип билсе болот?

Бул тууралуу КРнын Улуттук банкы билдирди.

Аны кантип текшерүүгө болот?

Эң ишенимдүү ыкма - кредиттик таржымалыңыз тууралуу маалымат алуу. Кыргызстанда муну төмөнкү жактардан кылууга болот:

• банктардын мобилдик тиркемелери аркылуу кызматтар бөлүмүнөн;
• түздөн-түз кредиттик бюролорго («Ишеним» же «Сэйф энд Саунд») кайрылуу менен жасоого болот.

Кредиттик тарыхтын эмнелерине көңүл буруу керек?

• Бардык насыялар сиздикиби? Учурдагы жана мурда алган насыяларыңыздын тизмесин кылдат текшериңиз.
• Төлөп бүткөн насыяларыңыз жабылган катары көрсөтүлгөнүнө жана алар боюнча, аз да болсо, карыз калбаганына ынаныңыз.
• Паспорттук маалыматтарыңыздын, дарегиңиздин жана телефон номериңиздин тууралыгын текшериңиз.

Өз атыңызга уруксатсыз насыя таризделишин кантип алдын алса болот?

• Кредиттик тарыхыңызды үзгүлтүксүз текшерип туруңуз. Бул маалыматты жок дегенде жылына бир жолу алып туруңуз.
• Өзүн-өзү кредит алууга тыюу салуу кызматын иштетиңиз. Эгер насыя алууну пландабасаңыз, «Түндүк» тиркемеси аркылуу насыя берүүгө бөгөт коюңуз.
• Абдан маанилүү: шектүү шилтемелерге кирбеңиз жана белгисиз сайттарга же мессенджерлерге жеке маалыматтарыңызды жана сыр сөздөрүңүздү киргизбеңиз.

Башка бирөөнүн документтери аркылуу микрокредит тариздөө менен байланышкан алдамчылык дагы деле актуалдуу бойдон калууда. Бирок өзүңүздү коргоо сиз ойлогондон да оңой. Санариптик гигиенанын негизги эрежелерин сактоо жана кредиттик тарыхты үзгүлтүксүз көзөмөлдөө тобокелдиктерди бир топ азайтат.