Кыргызстандан башка өлкөлөрдүн жарандарын алдашкан: УКМКнын кезектеги операциясы

Бул тууралуу УКМКнын басма сөз кызматы билдирди. 

Атайын кызматтын маалыматы боюнча, Кыргыз Республикасынын аймагынан чет өлкөнүн жарандарына карата алдамчылык аракеттерди жасаган трансулуттук кылмыштуу топтун ишмердүүлүгүнө бөгөт коюлду.

«Кылмыштуу ишмердүүлүк заманбап маалыматтык технологияларды, атайын иштелип чыккан программаларды жана чет элдик төлөм системаларын колдонуу менен потенциалдуу жабырлануучуларга этап-этабы менен иштеп чыгуу принцибинин негизинде уюштурулган», - деп түшүндүрдү атайын кызмат.

Маалым болгондой, козголгон кылмыш ишинин алкагында УКМК кызматкерлери шектүүлөр мыйзамсыз аракеттерди жасап, мыйзамсыз кирешелеринин изин жашыруу үчүн пайдаланган компьютерлерди, мобилдик аппараттарды жана башка жабдууларды алышкан.

«Бул трансулуттук топтун мыйзамсыз аракеттери чет мамлекеттердин жарандарына жасалган жана Кыргыз Республикасынын кызыкчылыгына каршы багытталган эмес», - деп белгиледи УКМК.

Мындай чет элдик кылмыштуу топтор менен күрөшүү Кыргызстандын эл аралык бедели үчүн да маанилүү. Бул өлкөнүн трансулуттук уюшкан кылмыштуулукка каршы турууга жана коопсуздук маселелери боюнча башка мамлекеттер менен кызматташууга даярдыгын көрсөтөт.

Учурда тергөө-ыкчам иш-чаралары улантылып жатканы кошумчаланды.