Кыргызстандыктардын пенсиялары октябрдан тарта канчага көбөйөт

Министрлер кабинети 2026-жылдын 5-сентябрындагы №601 токтому менен пенсияларды 2026-жылдын 1-октябрынан тарта индексациялоону бекитти. Документке ылайык, пенсиялардын камсыздандыруу бөлүктөрү 1,20 коэффициенти менен, башкача айтканда, 20%га индексацияланат. Мында көбөйтүүнүн суммасы 1 000 сомдон кем эмес жана 10 000 сомдон көп эмес болот.

Ошондой эле индексациядан кийинки пенсиялык төлөмдөрдүн минималдуу өлчөмдөрү белгиленди:

• 2026-жылдын 1-октябрына чейин дайындалган пенсиялар кайра эсептелгенден кийин үстөктөрдү эсепке албаганда 8 800 сомдон төмөн болбошу керек;
• 2024-жылдын 1-октябрынан тарта мурда 6 900 сомго жеткирилген пенсиялар 2026-жылдын 1-октябрынан тарта үстөктөрдү эсепке албастан, пенсиянын базалык бөлүгүнүн эсебинен ушул суммага чейин жеткирилет;
• 2025-жылдын 1-октябрынан тарта 7 100 сомго жеткирилген пенсиялар да үстөктөрдү эсепке албастан 7 100 сомго чейин жеткирилет.

Пенсия тиешелүү пенсионердин жашоо минимумунун өлчөмүнө жеткирилгенден кийин Социалдык фонд камсыздандыруу бөлүгүн индексациялайт.

Эгер камсыздандыруу бөлүгү индексациялангандан кийин 2026-жылдын 1-октябрына чейин дайындалган пенсиянын өлчөмү 8 800 сомдон төмөн болуп калса, ал пенсиянын камсыздандыруу бөлүгүнүн эсебинен ушул суммага чейин жеткирилет.

Социалдык фондго пенсияларды жаңы өлчөмдө өз убагында кайра эсептөөнү жана төлөп берүүнү камсыз кылуу тапшырылды.

Токтом 2026-жылдын 1-октябрынан тарта күчүнө кирет.