Кыргызстанда ак ниетсиз ишкерлердин ишин татаалдаштырышат

Документке ылайык, ак ниетсиз салык төлөөчүлөрдүн реестрин түзүү пландалууда.

Ага белгилүү бир өлчөмдө салык карыздары бар ишкерлер, ошондой эле жасалма электрондук эсеп-фактураларды колдонгондор же бизнесин башка адамдардын атына каттаткандар киргизилет.

Реестрге киргизилгендер үчүн бизнести каттоого жана кайра каттоого чектөөлөр каралат. Ошондой эле компанияларды каттоодо жалган адамдарды колдонуу жана жасалма эсеп-фактураларды тариздөө үчүн кылмыш жоопкерчилигин киргизүү пландалууда.

Мындан тышкары, бизнес расмий түрдө башка адамдардын атына катталган болсо да, аны иш жүзүндө башкарган адамдар жоопкерчиликке тартылышы мүмкүн.

Ошол эле учурда жарлык ак ниет ишкерлерди негизсиз кылмыш жоопкерчилигине тартуудан жана укук коргоо органдарынын алардын ишине кийлигишүүсүнөн коргоого да багытталган.

Министрлер кабинетине үч айдын ичинде тиешелүү мыйзам долбоорун даярдоо тапшырылды.