Нактамат vs банкомат: айырмасы эмнеде жана ал кимдер үчүн ылайыктуу

O!Bank”тын интернеттеги жана жарнамалык материалдарында көп учурда «нактаматты колдонуңуз» деген сөз айкашын кезиктирүүгө болот. Мындай түзүлүштөр жөнүндө толук маалымат алуу үчүн биз аталган банкка кайрылып, нактаматтын Кыргызстандын көптөгөн соода борборлорунда жана дүкөндөрүндө кездешүүчү кадимки банкоматтан эмнеси менен айырмаланарын түшүндүрүп берүүнү сурандык.

Нактамат деген эмне

Нактамат - бул O!Bank”тын кардарлары банктык картасыз накталай акча ала турган төлөм терминалы. Операцияны жүргүзүү үчүн «Мой O!» тиркемеси орнотулган смартфон гана керек. Башка банктардын кардарлары үчүн мындай терминалдар ылайыктуу эмес - нактамат O! экосистемасынын ичинде иштейт.

Банк кызматкерлеринин айтымында, нактамат тез арада накталай акча керек болуп, бирок карта жок болгон учурларда жардамга келет. Акча алуу тез жана оңой: колдонуучу терминалдын экранынан операцияны тандайт, тиркемедеги QR-кодду сканерлейт жана смартфондон операцияны ырастайт.

Накталай акча алуудан тышкары, нактаматтар аркылуу ар кандай кызматтарды - мобилдик байланыш, интернет, коммуналдык төлөмдөр жана терминалда жеткиликтүү болгон башка кызматтарды төлөөгө болот. Өлкө боюнча накталай акча берүү функциясы бар дээрлик 300 аппарат орнотулган.

Банкомат деген эмне

Банкомат – бул көпчүлүк кыргызстандыктарга жакшы тааныш болгон классикалык банктык түзүлүш. Ал биринчи кезекте банктык карталар менен иштөөгө арналган. Накталай акча алуу үчүн колдонуучуга пластикалык карта жана PIN-код керек.

Кыргызстандын коммерциялык банктарынын заманбап банкоматтары кошумча мүмкүнчүлүктөрдү да сунуштайт. Мисалы, айрымдарында NFC колдоосу бар смартфон же акылдуу саатты колдонуп, физикалык картасыз акча алууга болот. Эгерде карта гаджетке байланган болсо, банкомат колдонуучуну тааныйт жана операцияны жүргүзүүгө мүмкүндүк берет.

Эгерде банкомат NFC-модулу менен жабдылбаса, анын ордуна төлөм стикерлери колдонулушу мүмкүн - банктык эсепке байланган жана чип орнотулган контактсыз карта.

Негизги айырмачылыктар эмнеде?

Түзмөктөрдүн негизги айырмасы акча каражаттарына жетүү ыкмасы жана максаттуу аудиториясы болуп саналат.

Банкомат бул ар кандай банктардын кардарлары үчүн карталар жана банктык эсептер менен иштөөгө багытталган универсалдуу чечим. Ал эми нактамат - бул O!Bank кардарлары үчүн төлөм терминалы, ал смартфон жана мобилдик тиркеме аркылуу гана картасыз накталай акча алууга жана кызматтарды төлөөгө мүмкүндүк берет.

Ошентип, банкомат классикалык банктык операциялар үчүн негизги курал бойдон калууда, ал эми нактамат өз кезегинде санариптик кызматтардын колдонуучулары үчүн ыңгайлуу болуп саналат.