Өзбекстан ЕӨБга жетинчи мүчө мамлекет болот

Банктан билдиришкендей, Өзбекстан Банктын жетинчи катышуучусу жана капиталдын 10% үлүшү менен үчүнчү ири акционер болуп калат. Мыйзамдын кабыл алынышы Банктын ишине толук жана натыйжалуу катышуу укугун камсыздайт.

«Биз Өзбекстандын Евразия өнүктүрүү банкына мүчө мамлекет болуу чечимин кубаттайбыз. Бул өнөктөштүк Өзбекстандын жана бүткүл аймактарынын экономикалык өнүгүүсү үчүн чоң мүмкүнчүлүктөрдү ачат. ЕӨБ Өзбекстандын туруктуу, тез өсүү жана жарандарынын бакубаттуулугун жогорулатуу аракеттеринде колдоо көрсөтөт. Банк республикада инвестициялык долбоорлорду иштеп чыгууну баштады, анын биринчисин быйыл каржылоого ниеттенүүдө. Ар бир жаңы долбоор жана ар бир жаңы катышуучу менен биз Евразия чөлкөмүнүн туруктуу өнүгүүсүнө көмөк көрсөтүү менен өз миссиябызды аткарууну улантуудабыз», - деп белгиледи Евразия өнүктүрүү банкынын Башкармалыгынын төрагасы Николай Подгузов.

Өзбекстандын ЕӨБге кошулуусу республиканын транспорттук инфраструктурасын, энергетикалык комплексин, суу тармагын жаңылоо, өнөр жай жана айыл чарба тармагын өнүктүрүү үчүн жаңы мүмкүнчүлүктөрдү түзөт. Банктын мүчөлүгүнүн кеңейиши азыркы мүчө өлкөлөргө да пайда алып келет, анын ичинде өнөр жай кооперациясы, соода мамилелерин өнүктүрүү жана азык-түлүк коопсуздугу болуп саналат. 

Өзбекстанды ЕӨБ мүчөлүгүнө кабыл алуу чечими өткөн жылдын 16-июлунда Банктын Кеңеши тарабынан жактырылган жана декабрда Санкт-Петербургда өткөн Жогорку Евразиялык экономикалык кеңештин жыйынында Өзбекстандын президенти Шавкат Мирзиёев 2025-жылдын башында бардык зарыл процедураларды бүтүрүп, ЕӨБга кирүү ниетин билдирген. Январь айында мыйзам Олий Мажлистин Мыйзам чыгаруу палатасы тарабынан кабыл алынып, мартта Өзбекстандын Сенаты тарабынан жактырылган.

Маалымат үчүн: 

Евразия өнүктүрүү банкы (ЕӨБ) Евразия чөлкөмүндө инвестициялык ишмердүүлүктү жүзөгө ашырган көп тараптуу өнүктүрүү банкы болуп саналат. 18 жылдан ашык убакыттан бери ЕӨБ экономикалык байланыштарды чыңдоого жана кеңейтүүгө, ага мүчө өлкөлөрдүн ар тараптуу өнүгүүсүнө көмөк көрсөтүп келет.

2025-жылга карата ЕӨБ топтолгон портфелинде инвестициянын жалпы көлөмү 16,5 миллиард долларды түзгөн 305 долбоор камтылат. ЕӨБ портфелинин негизги үлүшүн транспорттук инфраструктура, санариптик системалар, жашыл энергетика, айыл чарба, өнөр жай жана машина куруу чөйрөлөрүндө интеграциялык эффекти бар долбоорлор ээлейт.