Wildberries сатып алуучулар үчүн кешбэк программасын ишке киргизди

Lenta.ru басылмасынын маалыматына ылайык, топтолгон упайлар келечектеги буйрутмаларды төлөө үчүн колдонулушу мүмкүн: 1 упай 1 рублга барабар. Белгиленгендей, бонустар сатып алуу баасынын 99% жаба алат жана алар башка акциялар жана арзандатуулар менен айкалышат.

Бирок, маркетплейстен такташкандай, бул кызмат Кыргызстандын аймагында жеткиликтүү эмес.

Эске салсак, буга чейин компания жаңы сатуучуларды каттоо шарттарына өзгөртүү киргизгенин билдирген. Тактап айтканда, Wildberries банкынан эсеп ачуу талабы жокко чыгарылган. Мындай чечим өнөктөштөрдүн пикирлерин талдоодон кийин кабыл алынган. Эми жаңы сатуучуларды текшерүү процедурасы платформа тарабынан банктык операцияларсыз өтөт.

Мындан тышкары, июнь айында Wildberries & Russ компаниясынын башкы директору Татьяна Ким өздүк банктык карталарды ишке киргизгенин жарыялаган. Анын айтымында, карталар компаниянын кызматкерлери арасында жүгүртүүдө жана башка нерселер менен катар оффлайн төлөмдөр үчүн ылайыктуу.