КРнын аймагынан тышкары иштейсизби? Бирдиктүү салыкка өтүү мөөнөтү узартылды

Салык кызматы Кыргызстандын аймагынан тышкары ишмердүүлүк жүргүзүүнү пландаган салык төлөөчүлөр 2026-жылдын 1-январынан тартып 0,1 пайыз ставкасы боюнча бирдиктүү салыктын негизинде салык салуунун жөнөкөйлөтүлгөн системасын колдонууга милдеттүү экенин эскертет.

«Колдонуудагы мыйзамдарга ылайык, аталган салык системасын колдонуу үчүн салык төлөөчүлөр 2026-жылдын 1-февралына чейин салыктык каттоодон өткөн жери боюнча 0,1 пайыздык ставкадагы бирдиктүү салыкка өтүү жөнүндө арыз берүүгө тийиш болгон», - деп билдирди МСК. 

Салык төлөөчүлөрдөн келип түшкөн кайрылууларга байланыштуу, салык салуунун аталган системасына өтүү үчүн арыз берүү мөөнөтү 2026-жылдын 1-мартына чейин узартылды.

Салык кызматы салык төлөөчүлөрдү бирдиктүү салыктын негизинде атайын салык режимине өтүү үчүн аймактык салык органдарына арыз менен кайрылууга чакырат.