Мамлекеттен батир: МИК ипотекасына кантип тапшыруу керек

Кимдер катыша алат?

МИК сайтында көрсөтүлгөн негизги талаптар:

• жашы 18 же андан улуу;
• жалпы иш тажрыйбасы 2 жылдан кем эмес же азыркы иштеген жеринде 1 жылдан кем эмес;
• арыз берүүчүнүн, анын жубайынын (же жолдошунун) жана жашы жете элек балдарынын Кыргызстандын аймагында турак-жайы болбошу керек;
• үй-бүлө акыркы 3 жылдын ичинде турак жай сатып, белекке берип же башка жол менен менчикке өткөрүп бербеши керек.

Кандай ипотекалык программалар бар?

Социалдык ипотека:

• жылдык 4%;
• 25 жылга чейинки мөөнөткө;
• алдын ала төлөм жок.

Көп балалуу үй-бүлөлөргө (жашы жете элек беш баладан), «Баатыр эне» ордени менен сыйлангандарга, ден соолугунун мүмкүнчүлүгү чектелген адамдарга, ден соолугунун мүмкүнчүлүгү чектелген балдарды тарбиялап жаткан үй-бүлөлөргө, расмий камкорчуларга, жалгыз бой ата-энелерге жана айыл жеринде иштеген 35 жашка чейинки жаш адистерге арналат.

Жеңилдетилген ипотека:

• 4% жылдык пайыздык чен;
• 25 жылга чейинки мөөнөткө;
• алдын ала төлөм жок.

Мамлекеттик органдар, муниципалитеттер, мектептер, ооруканалар, укук коргоо жана коопсуздук органдарынын, мамлекеттик ишканалардын, телерадио уюмдарынын жана башка мамлекеттик сектордун мекемелеринин кызматкерлери үчүн жеткиликтүү.

Жеткиликтүү ипотека:

• 8% жылдык пайыздык чен;
• 25 жылга чейинки мөөнөткө;
• алдын ала төлөм жок.

Жеке сектордо иштеген жарандарга арналган.

Бул программага ылайык, мамлекет тарабынан курулган турак жайлар ижарага берүү механизми аркылуу берилет.

Мындан тышкары, KfW өзүнчө ипотекалык программасы аймактардын (Бишкек жана Ош шаарларынан тышкары) тургундары үчүн жеткиликтүү.

Үлүштүк турак жай курулушу

Бул программанын алкагында батирди курулуп жаткан учурда сатып алууга болот.

Шарттары:

• пайыздык чен — жылдык 8%;
• ипотеканын мөөнөтү - 15 жылга чейин;
• баштапкы төлөм - мүлктүн наркынын кеминде 50%.

Ага үй-жайы жок жарандар, эгерде алар да, алардын үй-бүлө мүчөлөрү да акыркы үч жыл ичинде турак-жайын сатпаса, белекке бербесе же менчикке өткөрүп бербесе, катышууга укуктуу.

Топтоого негизделген ипотека

Бул «Менин үйүм» программасынын алкагында үлүштүк курулуш принцибинде иштеген турак-жай сатып алуунун дагы бир механизми.

Бул кантип иштейт:

• батирдин баштапкы баасынын 30% 6 айга банктык депозитке салынышы керек;
• дагы 20% банк тарабынан жылдык 10% менен 5 жылдык мөөнөткө кредит катары берилет;
• калган 50% жылдык 8% менен 15 жылга чейинки мөөнөткө ипотека аркылуу каржыланат.

Программанын негизги артыкчылыктарынын бири эч кандай күрөө талап кылынбайт.

Арызды кантип тапшыруу керек?

• portal.gik.kg порталына катталуу керек.
• Жеке идентификациялык номерди колдонуу менен жеке кабинетке кириңиз.
• Кызматтар үчүн төлөмдү «Кызмат төлөө» бөлүмүндө жүргүзүңүз.
• Профилиңизди Balance.kg тиркемеси аркылуу ырастаңыз (катышуучу жана анын жубайы/же жолдошу жеке маалыматтарын иштетүүгө макулдук бериши керек).
• «Менин арыздарым» бөлүмүндө анкетаны толтуруп, текшерүүгө жибериңиз.  

Маалыматтарды ырастагандан кийин мамлекеттик органдарга берилген электрондук кайрылуулар үчүн төлөм жүргүзүү керек. Аны «Элкарт Мобайл», «Элсом», MegaPay, Balance.kg, Eldik, «О!Деньги» и Optima24 аркылуу ишке ашырууга болот.