Орусияда алдамчылардын көзүнө – улгайгандар, балдар жана криптовалютанын ээлери илинет

Мындай пикир менен ПЭЭФ-2025 иш-чарасынын алкагында РИА Новости басылмасына  «Лаборатория Касперский» компаниясынын керектөөчүлөр бизнес бөлүмүнүн директору Михаил Гербер билдирди.

«Улгайган адамдардан тышкары, өзгөчө көңүл бурууну талап кылган дагы бир топ – бул телефон колдонгон, интернетке эрте курактан эле кире баштаган жаш балдар. Бул курак жылдан жылга кичирейип баратат», – деп билдирген Михаил Гербер.

Ал балдарга багытталган коркунучтардын көбөйгөнүн белгиледи. 2025-жылы Орусияда Android түзмөктөрүнө болгон чабуулдар 60%га көбөйгөн. Алдамчылар зыяндуу программаларды балдардын популярдуу оюндарын туурап жайылтышууда. Балдардын кызыгуусунан пайдаланып, алар түзмөктү вирус аркылуу жугузушат.

Гербердин айтымында, мындай схемалар үйдөгү Wi-Fi туташкан башка түзмөктөргө да жукканга шарт түзөт.

«Криптовалюта ээси болгон жарандарга карата коркунучтар дагы өсүүдө. Алдамчылар түзмөктөн криптокапчыктарды издеп же сүрөттөрдү карап чыгып, капчыктарга кирүү ачкычтарын тапканга аракет кылышат», – деп түшүндүргөн адис.