Орусиядагы кыргызстандыктар үчүн бирдиктүү номер жана финтех-кызматтары бар мобилдик оператор ишке кирет

Кыргызстандагы биринчи финтех-экосистемасы бар виртуалдык мобилдик операторду (MVNO) ишке киргизүү тууралуу келишим VIII Кыргыз-Орус экономикалык форумунда түзүлдү.

Долбоор «МВНО БКГ» ЖЧКсы тарабынан «Скай Мобайл» ЖЧКсы (Beeline Кыргызстан) жана «ВымпелКом» ААКсы («Билайн Орусия») менен биргеликте Орусия-Кыргыз өнүктүрүү фондунун каржылык колдоосу астында ишке ашырылат.

Долбоордун негизги өзгөчөлүгү – кыргыз жана орус эки санарип профили бар SIM-карта болот. Бул абоненттерге SIM-картаны алмаштырбастан Кыргызстан менен Орусияда мобилдик байланышты колдонууга, көчүп барганда мурдагы номерин сактап калууга жана бирдиктүү тарифти пайдаланууга мүмкүнчүлүк берет. Мындан тышкары, кызмат санарип капчык менен интеграцияланып, финансылык операцияларды жүргүзүүнү жеңилдетет.

Орус-Кыргыз өнүктүрүү фондунун жетекчиси Артем Новиков белгилегендей, долбоор биринчи кезекте Орусияда эмгектенген кыргызстандыктарга жана алардын үй-бүлөлөрүнө багытталган.

«Бул Кыргызстандагы алгачкы демилге. Ал атайын Орусияда иштеген мекендештерибиз жана алардын үй-бүлөлөрү үчүн түзүлдү. Биздин максат - мобилдик байланышты, санарип кызматтарды жана ыңгайлуу акча которууларды бир жөнөкөй системага бириктирүү. Натыйжада жакындар менен байланышып туруу жана чек аранын эки тарабында финансылык маселелерди чечүү жеңил жана ыңгайлуу болот», – деп билдирди ал.

Долбоордун башкаруучу өнөктөшү Дмитрий Юмашевдин айтымында, жаңы экосистема эмгек мигранттарына байланышта болуу менен гана чектелбестен, чет өлкөдө жашоо жана иштөө үчүн зарыл болгон ар түрдүү санарип кызматтарды пайдаланууга жардам берет.

Кыргызстанда пилоттук долбоор ишке киргенден кийин аны Борбор Азиянын башка өлкөлөрүнө да жайылтуу пландалууда. Тактап айтканда, Тажикстан жана Өзбекстандагы байланыш операторлору менен алдын ала макулдашууларга жетишилген.

Beeline Кыргызстандын башкы директору Кубаныч Шатемиров компаниянын бул долбоорго катышуусу телекоммуникациялык кызматтарды өнүктүрүү менен гана эмес, өлкөдөн тышкары иштеп жаткан кыргызстандыктарды колдоо максатын да көздөөрүн белгиледи.

«Заманбап технологиялар жарандардын реалдуу муктаждыктарына жооп бериши жана чек аралар менен аралыктарга карабастан, үй менен байланышты сактоого жардам бериши маанилүү», – деди ал.