Криптовалютаны Кыргызстандын банк системасына интеграциялоо пландалууда

Экономика министрлиги «Виртуалдык активдер жөнүндө» мыйзамына өзгөртүүлөрдү киргизүү боюнча долбоорду коомдук талкууга алып чыкты.

Документ банктарга, банктык эмес финансы-кредиттик уюмдарга жана Улуттук банк көзөмөлдөгөн башка юридикалык жактарга виртуалдык активдерди сатып алууга, сатууга жана алмаштырууга уруксат берүүнү сунуштайт.

Азыр мындай уюмдарга виртуалдык активдерди которууга, сактоого жана башкарууга, ошондой эле аларды жайгаштыруу жана сатуу менен байланышкан финансылык кызматтарга гана уруксат берилген. Алар үчүн криптоактивдерди сатып алуу жана алмаштыруу боюнча операцияларга тыюу салынган.

Министрлик ыйгарым укуктарды кеңейтүү криптоактивдерди салттуу банк тутумуна интеграциялоого, виртуалдык активдердин жүгүртүлүшүн көбөйтүүгө жана операциялардын ачык-айкындуулугун жогорулатууга мүмкүндүк берет деп эсептешет.

Ошондой эле салыктык түшүүлөрдүн көбөйүшү, финтек секторунда жаңы жумуш орундарынын түзүлүшү, чет элдик инвестициялардын тартылышы күтүлүүдө.

Мекеме акыркы жылдары өлкөдө жарандар арасында да, бизнес арасында да виртуалдык активдерге кызыгуу бир топ өскөнүн белгиледи.