Бишкектеги каракчылык окуясы боюнча кошумча маалымат

Кол салгандар жабырлануучуларга карата күч колдонуп, денесине залал келтирип, акча каражаттары салынган рюкзакты тартып алышып, кылмыш болгон жерден башка номер коюлган Ford Focus үлгүсүндөгү автоунаа менен качып кетишкен. 

Жабырлануучулардын колдору жана бетинен кесилген жаракаттары болуп, ооруканага жеткирилип, тиешелүү медициналык жардам көрсөтүлдү. 

Окуя боюнча Кыргыз Республикасынын Кылмыш-жаза кодексинин 207-беренеси («Каракчылык») менен кылмыш иши козголду. 

Тергөө учурунда каракчылык кылган 4 жаран, окуя болгон жерден качып кетишкен Ford Focus автоунаасын Чуйков көчөсүндө тыштап, чет элдик номери тагылган Lada үлгүсүндөгү автоунаага түшүп кеткени такталды. 

Бул окуя ИИМдин жетекчилигинин көзөмөлүнө алынып, кылмыш жасаган адамдарды аныктоого жана кармоого багытталган бардык тергөө аракеттери жана ыкчам-издөө иш-чаралары жүргүзүлүп жатат. 

ИИМдин Басма сөз кызматы

Фото: РосСМИ