Салык кызматы салык реформасын жарыялады: аз текшерүүлөр, күчөтүлгөн көзөмөл

Мыйзам долбоору эмнени карайт:

• Транспорттук кыймылга салынуучу салыкты жоюу;
• Айдоо жерлерине салыктар боюнча жеңилдиктерди берүү;
• Айрым категориядагы салык төлөөчүлөрдү текшерүүгө тыюу салуу;
• Салык карыздарын кечүү;
• Чет өлкөгө чыгууга тыюу салууну алып салуу жол-жобосун жөнөкөйлөтүү;
• Патенттик негизде салык салуу тутумун киргизүү;
• Чакан ишкердик субъекттери үчүн салык жеңилдиктерин (чектик көлөмдөрдү жогорулатуу) белгилөө;
• Анонимдүү субъекттерге товар же кызмат көрсөтүүдө сатуудан алынуучу жана бирдиктүү салыктын пайыздык чендерин төмөндөтүү.

Максаты — чакан жана орто бизнести колдоо, алардын туруктуу өнүгүшүн камсыз кылуу жана салык базасын кеңейтүү менен ишкерликке кошумча жүк жаратпоо.

Адилетсиз схемаларга көзөмөл кылуу

Салык кызматы жеңилдиктер берилгенине карабастан, бардык салык субъекттери мыйзамды сактоого милдеттүү экенин эскертет. Буга байланыштуу, салык кызматы салык төлөөдөн качкандарды аныктоо үчүн аналитикалык иштерди күчөтүп, заманбап санариптик инструменттерди ишке киргизүүдө. Алардын катарына төмөнкүлөр кирет:

• Жеңилдетилген салык режимине өтүү максатында ишкерликти  жасалма бөлүү;
• Жасалма келишимдерди түзүү;
• Кирешелерди жашыруу.

Санариптик технологиялар жана башка мамлекеттик органдар менен маалымат алмашуу аркылуу ишкерлердин экономикалык активдүүлүгү системалуу түрдө көзөмөлдөнөт.

Ишкерлерге кайрылуу

Салык кызматы ири жана орто бизнестин өкүлдөрүн мамлекеттин колдоо чараларын туура пайдаланууга чакырат. Салыктык милдеттенмелерди толук аткаруу — атаандаштыкты камсыздоонун, экономикалык өсүштүн жана коомдук туруктуулуктун негизги шарты болуп саналат.