Биткоиндин баасы тездик менен өсүп жатат: абалга саресеп

Бул тууралуу соода маалыматтары күбөлөндүрөт.

Аналитиктердин белгилешинче, биткоин кайрадан 80 миң доллардык психологиялык чектен өттү. Эми рыноктогу негизги суроо – криптовалютанын  ушул деңгээлден жогору баада бекий алышы болуп саналат.

Өсүү бир нече оң фактордун фонунда болду: дүйнөлүк фондулук рыноктор жогорулады, АКШнын казына облигацияларынын кирешелүүлүгү төмөндөдү, доллар арзандады. Ошондой эле АКШнын Федералдык резерв системасы пайыздык чендерди мындан ары жогорулатуудан баш тартууга даяр экени тууралуу маалымат пайда болду.

Ошол эле учурда эксперттер биткоиндин алдында күчтүү каршылык көрсөтүүчү зона турганын эскертишүүдө.

Bloomberg басылмасынын маалыматына караганда, көптөгөн узак мөөнөттүү ээлер өз монеталарын 83-86 миң доллар аралыгында сатууну пландап жатышат. Бул кирешени бекитүүгө түрткү берип, андан ары өсүштү чектеши мүмкүн.

Эске салсак, 2026-жылдын биринчи жарымында биткоиндин баасы кыйла төмөндөгөн. Мунун негизги себеби катары инвесторлордун кызыгуусунун азайышы айтылган - соода көлөмүнүн төмөндөшү криптовалюта рыногу үчүн эң олуттуу терс белги болгон.

Легендарлуу инвестор Рэй Далио буга чейин билдиргендей, биткоин азырынча «жаңы алтын» деген статуска жетүүдөн алыс. Анын пикиринде, криптовалютада купуялуулук жетишсиз, анын баасы технологиялык компаниялардын акцияларына өтө көз каранды, ал эми капиталдаштыруусу алтындыкынан кыйла төмөн бойдон калууда.