Банктарда ашыкча каражат топтолгон: Улуттук банк аны жүгүртүүдөн алып чыгууну күчөттү

Финансылык жөнгө салуучу органдын отчетунда маалымдалгандай, Улуттук банктын операцияларына чейин ашыкча ликвиддүүлүктүн орточо күндүк көлөмү 167 млрд сомду түзгөн. Бул мурунку кварталга салыштырмалуу 5,8%га, ал эми бир жыл мурунку көрсөткүчкө салыштырмалуу 40,8%га көп.

Ошол эле учурда жай мезгилине карата көлөм акырындап төмөндөгөн: апрель айында ашыкча резервдердин көлөмү 176,4 млрд сомду түзсө, июнда 158,9 млрд сомго чейин азайган.

Ашыкча каражат инфляцияны күчөтпөшү үчүн Улуттук банк банктардагы ликвиддүүлүктү активдүү түрдө ала баштады. Май айынан тартып жөнгө салуучу 7, 91 жана 182 күндүк мөөнөткө өз ноталарын чыгарууну көбөйттү.

II кварталда Улуттук банк банк тутумунан күн сайын орточо 162,9 млрд сом жүгүртүүдөт алып турган. Ал эми мурунку кварталда бул көрсөткүч 150,9 млрд сомду түзгөн.

Мында стерилизациялоодо Улуттук банктын ноталарынын үлүшү 17,8%га чейин өскөн. Негизги инструмент катары мурдагыдай эле «овернайт» депозиттери колдонулуп, алардын үлүшү 82,2%ды түзгөн.

Мындан тышкары, банк тутумундагы акчанын көлөмүнө валюталык интервенциялар да таасир эткен. II кварталда Улуттук банк ички рынокто 560,8 млн долларга же болжол менен 48,9 млрд сомго барабар чет элдик валютаны саткан. Бул I кварталдагы көрсөткүчтөн аз, анда сатуунун көлөмү 725,5 млн долларды түзгөн.