Кыргызстандын банктары жарым жылда 18 млрд сом киреше тапты

Мындай маалыматтар Улуттук статистика комитетинин отчетунда айтылат.

1-июлга карата өлкөдө 26 коммерциялык банк жана 308 филиал иштеп жатат. Банк тармагында дээрлик 25 000 адам эмгектенет, ал эми кардарлардын эсептеринин саны 24 миллиондон ашты - бир жыл ичинде алардын саны 6,8 млнго көбөйгөн.

Банктардын кирешеси январь–июнь айларында 97,5 млрд сомду түздү. Бул өткөн жылдын ушул мезгилине салыштырмалуу 46,4%га көп.

Негизги өсүштү төмөнкүлөр камсыздаган:

• кредиттер боюнча пайыздык кирешелер +12,8 млрд сом;
• комиссиялар +6,4 млрд сом;
• валюталар менен жүргүзүлгөн операциялар +6 млрд сом;
• мамлекеттик баалуу кагаздар боюнча кирешелер +3,5 млрд сом.

Ошол эле учурда банктардын чыгымдары да өсүп, 79,5 млрд сомго жетти, башкача айтканда, болжол менен 1,6 эсеге көбөйдү.

Жыйынтыгында 21 банк жалпы 18,2 млрд сом өлчөмүндө пайда тапты. Дагы беш банк жарым жылдыкты 217,5 млн сом чыгым менен жыйынтыктады.

Банк секторунун жалпы пайдасы 18 млрд сомду түзүп, өткөн жылдын ушул мезгилине салыштырмалуу 12,5%га өстү.

327 млрд сомго кредит берилди

Банктар экономиканы кредиттөө көлөмүн да кыйла көбөйттү. Биринчи жарым жылдыкта 327,3 млрд сомго кредит берилген. Бир жыл мурда бул көрсөткүч 241,3 млрд сомду түзгөн.

Июнь айынын соңуна карата экономикадагы кредиттердин жалпы калдыгы 602 млрд сомго жетти. Анын ичинен:

• 495,1 млрд сом - улуттук валютадагы кредиттер;
• 106,9 млрд сом - чет өлкөлүк валютадагы кредиттер.

Калктын депозиттери да өстү: алардын жалпы калдыгы бир жыл мурдагы 316,2 млрд сомго салыштырмалуу 388,4 млрд сомго жетти.

Мында кыргызстандыктардын топтогон каражаттарынын басымдуу бөлүгү улуттук валютада сакталат - 243,9 млрд сом. Дагы 144,5 млрд сом валюталык депозиттерге туура келет.