25 жылга чейин жана баштапкы төлөм 10% — МИКтин аялдар үчүн жаңы ипотекасынын шарттары

Долбоорду ишке ашыруунун биринчи этабында өлкө аймактарындагы (Бишкек жана Ош шаарларын кошпогондо) аялдар үчүн ипотекалык насыялоо программасы ишке киргизилет. Азырынча «Элдик Банк» аркылуу жеткиликтүү, кийин башка банктар да долбоорго кошулат, ошондой эле кийинки этапта «Жашыл ипотека» программасы ишке киргизилет.

Ипотекалык насыянын шарттары:

• насыянын мөөнөтү – 25 жылга чейин;
• баштапкы төлөм – турак жайдын наркынын кеминде 10%ы; 
• үй-бүлөнүн ай сайынкы жалпы кирешеси 120 000 сомдон ашпоого тийиш; 
• сатып алууга боло турган турак жай курулушу толук бүткөн жана пайдаланууга расмий берилген болушу керек; 
• батирдин аянты 100 м²ге чейин, ал эми жеке турак үйдүн аянты 200 м²ге чейин болушу мүмкүн.

Пайыздык чендер:

• жылдык 10,75% (натыйжалуу пайыздык чен – 11,37%дан) – Бишкек жана Ош шаарларынан турак жай сатып алуу үчүн;
• жылдык 9,75% (натыйжалуу пайыздык чен – 10,26%дан) – Кыргыз Республикасынын аймактарынан турак жай сатып алуу үчүн.

Программага МИКтин турак жай алуу боюнча расмий кезек тизмесинде катталган жарандар гана катыша алышат. Талаптарга жооп берген жарандарга SMS жана электрондук почта аркылуу билдирүү жөнөтүлөт. 

«Жашыл ипотека» программасы энергияны үнөмдөөчү турак жайларды сатып алууга, курулуш тармагында заманбап экологиялык технологияларды колдонууга жана турак жайлардын энергия керектөөсүн азайтууга багытталат. 

Буга чейин Мамлекеттик ипотекалык компания менен «Элдик Банк» Азия өнүктүрүү банкынын колдоосу менен аялдарды колдоого багытталган долбоорду ишке ашыра турганы кабарланган. Долбоордун жалпы каржылоо көлөмү 65 миллион долларды түзөт.

Banks.kg сайтында МИК ипотекасына кантип тапшыруу керектиги жана МИК жеке курулуш компаниясы менен өнөктөштүктө батирлерди сата баштаганы тууралуу маалыматтар жарыяланган.