Бишкекте унаа токтотуучу жайга акча төлөбөй койсоңуз, олчойгон айып пул төлөп каласыз

Унаа токтотуучу жайларды башкаруунун натыйжалуулугун жогорулатуу жана муниципалдык унаа токтотуучу жайларды пайдалануу эрежелеринин сакталышын камсыз кылуу максатында «Шаардык жол-транспорттук инфратүзүм»  муниципалдык ишканасынын кызматкерлери «Жөө патруль» мобилдик тиркемесин колдонуп башташат. 

Бул тиркеме төмөнкүлөргө мүмкүндүк берет:

• унаа токтотуучу орундардын пайдаланылышына мониторинг жүргүзүүгө;
• транспорт каражаттарынын жайгаштырылышын каттоого; 
• унаа орундардын толушун эсепке алууга.

Заманбап санариптик куралдарды колдонуу эсепке алуунун ачык-айкындуулугун жогорулатууга, унаа токтотуучу жайды пайдалануу эрежелеринин сакталышын натыйжалуу көзөмөлдөөгө жана жол кыймылынын бардык катышуучулары үчүн бирдей шарттарды түзүүгө мүмкүндүк берет. 

Кыргыз Республикасынын Укук бузуулар кодексинин 192¹-беренесине ылайык, акы төлөнүүчү муниципалдык унаа токтотуучу жайга транспорт каражатын токтотуу үчүн белгиленген акыны төлөөдөн качуу айып пулга алып келет. Анда:

• жеке жактарга 10 эсептик көрсөткүч өлчөмүндө (1 000 сом);  
• юридикалык жактарга 50 эсептик көрсөткүч өлчөмүндө (5 000 сом).

Бул унаа токтотуучу жайлардын бардык колдонуучулары үчүн бирдей шарттарды камсыз кылууга, бош орундардын жеткиликтүүлүгүн жогорулатууга, аларды пайдалануу тартибин сактоого, унаа токтотуучу орундарды узак убакытка ээлеп туруу учурларын азайтууга жана шаарда ыңгайлуу чөйрөнү түзүүгө багытталган. 

Унаа токтотуучу жайларга төлөмдөр электрондук кызматтар жана башка төлөм ыкмалары аркылуу жүргүзүлөт, алар жөнүндө маалымат унаа токтотуучу жайларда илинет.