Баалар өсүүдө: Кыргызстанда кызмат көрсөтүүлөр 10%дан ашыкка кымбаттады

Бул тууралуу Улуттук статистика комитетинин төрагасынын биринчи орун басары Назира Керималиева брифингде билдирди.

Азык-түлүк жана алкоголсуз суусундуктардын баасы 6,4%га, алкоголдук ичимдиктер жана тамеки буюмдары 7,7%га, азык-түлүк эмес товарлар 6,1%га кымбаттады.

Калкка көрсөтүлүүчү кызматтардын тарифтери 11,4%га жогорулады.

Эң көп эт, тооктун жумурткасы, жаңы мөмө-жемиштер, сүт азыктары, балык, кант, өсүмдүк майы жана сары май, нан жана ун кымбаттады. Ошол эле учурда жаңы жашылчалардын, картошка, сүт жана күрүчтүн баасы төмөндөдү. Баалардын өсүшү Кыргызстандын бардык аймактарында катталды. Эң көп өсүш Ош облусунда болуп, 17,3%ды түздү.

Эске салсак, Кыргызстанда керектөө баалары жана тарифтер 2026-жылдын январь–июль айларында 6,7%га өскөн.

Буга чейин Кыргызстанда инфляция 2026-жылдын жыйынтыгы боюнча мурда күтүлгөн 9%дын ордуна 14–15%ды түзүшү мүмкүн экени маалымдалган.

Ошондой эле Жакынкы Чыгыштагы согуш жана климаттык өзгөрүүлөрдөн  улам дүйнөдө азык-түлүктүн баасы жылдын аягына чейин кыйла өсүшү мүмкүн, ал эми баалардын эң жогорку өсүшү 2027-жылы күтүлүүдө.